Ispilua alderantziz. "La Caixa" Fundazioaren eta MACBAren bildumen artea
Sarrera
Manuel Millares, Homunkulua (Homúnculo), 1960
Iruzkinak
Antonio Saura, Irudi biluzi handia (Grand nu), 1960–61
- Izenburua:
- Antonio Saura, Irudi biluzi handia (Grand nu), 1960–61
- Erakusketa:
- Ispilua alderantziz. "La Caixa" Fundazioaren eta MACBAren bildumen artea
- Gaiak:
- Giza gorputza | Artea eta emozioa | Eragin artistikoa | Sorkuntza artistikoa | Sinbologia | Biluzia | Dau Al Set | El Paso taldea | Gerra Zibila (Espainia) | Frankismoa | Herri-kultura | AEB | Espainia | Europa
- Mugimendu artistikoak:
- Arte Garaikidea | Arte informala | Espresionismo Abstraktua
- Teknikak:
- Keinu-pintura
- Artelan motak:
- Pintura
- Aipatutako artistak:
- Millares, Manuel | Saura, Antonio
Pintura ausart honetako gizonezko irudiak mihisetik kanpo irten nahi duela ematen du; irudi artegagarria eta estugarria benetan. Pintura lodi-lodi eman zuen Saura-k, halako kar biziaz eta indar bortitzez. Kontraste izugarria dago deformatutako irudiaren eta ezkerreko eskuan daraman gurutze finaren eta zehatzaren artean.
Espainiako Gerra Zibilak, 1936tik 1939ra, sufrimendu ikaragarria eragiteaz gainera, izugarrizko errepresioa ekarri zuen. Urte batzuk Frantzian bizi ondoren, Antonio Saura Madrila itzuli eta artista nagusietako bat bilakatu zen Espainian. Saurarentzat obsesio bihurtu zen giza gorputzaren arketipo bat sortzea. Irudi biluzi handia margolanean, Katolizismoaren ahalmen handiko imajinez baliatu zen gorputz biluzi eta oinazetu hau irudikatu zuen, giza egoeraren sinbolo izan zedin.
Areto honetako Espainiako artistek bide berriak bilatzen jardun zuten erregimen totalitarioaren uztarpean bizi zirela, ezarritako sistemaren kontrako arte erradikala sortzeko. Zenbait talde eratu zituzten, El Paso eta Dau al Set, besteak beste.
Saura eta Manuel Millares, gerra amaituta, El Paso taldeko kide izan ziren. Talde hark Espainian gerra zibilak utzitako hutsune kulturala betetzen lagundu zuen. El Paso izena taldeak arteari buruz zituen ideia aurrerakoiak aipatzeko modu bat zen. 1957an eratu zen El Paso, eta bizialdi laburra izan arren, funtsezkoa izan zen Europako eta Estatu Batuetako arte-munduan bizi-bizirik zeuden ideia berriak Espainian barneratzeko. Oihartzun handiko manifestu eta erakusketa baten bitartez, Saurak eta El Pasok AEBko Espresionismo Abstraktuaren eta Europako Arte Informalaren teoriak eta teknikak azaldu zituzten, eta keinuzko abstrakzio berri batera bultzatu zuten Espainiako artea. Hala ere, Sauraren arteak espainiar kutsu nabaria izaten segitu zuen, eta, neurri handi batean, Espainiako pinturaren maisu handien pausoei jarraitu zien. Izan ere, Velázquez eta Goya izan ziren haren eredu nagusiak.
Lan honetan, irudi biluziaren jarrera arraroak Espainiako pinturaren Urrezko Aroan, Barrokoan alegia, irudikatutako martiri erlijiosoak gogora ekartzen dizkigu. Halako irudiak bi modutan agertzen ziren, etzanda edo alderantzikatuta. 1950eko eta 1960ko hamarkadetan artista espainiarrak haien kide artista estatubatuar eta europarrengandik bereizi ziren: espainiarren lanei barneko biolentzia bizia zerien.