James Rosenquist: atzera begirakoa

Iruzkinak

Flamenko kapsula (1970)

Flamenko Kapsula, sail honetan aurkeztutako gainerako obrak bezala, Rosenquistek zientzia, teknologia eta kosmosaren aurrean duen interesaren erakusgarri da. Rosenquistek 1970ean pintatu zuen obra hau, Apolo 1eko misio espazialerako entrenamendu saio batean gertatu zen eztandan hil ziren hiru astronauten oroimenez. Pinturak grabitaterik gabeko ingurune batean kokatzen gaituela dirudi, edozein moduz airean flotatzen ari diren gaiekin. Goialdean, kolore biziko eremu batean gainean, uniforme baten zilar koloreko oihal zimurtua ikusten dugu, bandera amerikarrarekin. Eta behealdean, janari poltsa erraldoi eta bihurritu bat, elikatzeko tutu batekin. Ezkerraldera, Rosenquistek jaisten ari den globo baten kamera geldiko irudi bat gehitu du, astronauten birikak eta espazioko oxigeno premia irudikatzen dituena.

Pintura abstraktua eta enigmatikoa da, baina historiaren une jakin bat aditzera ematen digu, heroismoa eta patriotismoa batzuetan elkarren etsai izango balira bezala agertu zirenean. Estatu Batuetako gobernuak Vietnamen bete zuen zeregina zalantzan jarri arren, Rosenquistek miresmen handia sentitu izan du beti NASAren eta espazioko bidaien aurrean. Hemen Iparramerikako programa espazial hartan beren bizitza sakrifikatu zuten astronautekiko ezintasunaren sentimendua aditzera ematen digu.

Rosenquist asko ahalegintzen da koadro baten gainazal lauari ahalik eta etekin handiena ateratzen. Flamenko Kapsula-ren bi muturretan kokatuta dauden mylarrezko panelek mihisearen informazio bisuala zabaltzen dute, gu mugitu ahala aldatzen doazen bizitasun handiko isla ikusgarriak eskainiz. Hasieratik pinturarekin batera egoteko diseinatu bazituen ere, hau da pinturaren ondoan erakusten zaizkigun lehenengo aldia.