Lygia Clark. Pintura eremu esperimental gisa, 1948-1958
Konposizioa (Composição), 1953
Markoa hautsiz (Quebra da moldura), 1954
Iruzkinak
Lerro organikoaren aurkikuntza (Descoberta da linha orgânica), 1954
- Izenburua:
- Lerro organikoaren aurkikuntza (Descoberta da linha orgânica), 1954
- Erakusketa:
- Lygia Clark. Pintura eremu esperimental gisa, 1948-1958
- Gaiak:
- Arkitektura | Artea eta espazioa | Artea. Teoria | Ibilbide artistikoa | Esperimentazio artistikoa | Lan intelektuala | Sorkuntza artistikoa | Geometria | Lerroa | Markoa | Escola Nacional de Arquitetura (Belo Horizonte)
- Artelan motak:
- Pintura
- Aipatutako artistak:
- Clark, Lygia
Olio-pintura mihise gainean
59,5 x 80 cm
Bilduma pribatua, Rio de Janeiro
X.2017.76
Berrogeita hamarreko hamarkadaren erdialdean, pintura tradizionalaren funtzionaltasuna eta haren konbentzio espazialak zalantzan jartzen hasi zen Clark. Artelan berrietan, margolana objektutzat jotzen zuen, alegia, espazio arkitektoniko zehatz batean existitzen zen objektutzat, ez paretan zintzilikatutako bi dimentsioko iruditzat. Mihiseei markoak ezartzeari utzi zion, eta konposizioak elementu geometriko funtsezkoenetara murriztu zituen. Margotutako objektuaren elementu arkitektonikoak ikertzeari ere ekin zion, lerroa batez ere.
Margolan honek Clarkek bere “lerro organikoaren aurkikuntza” deritzona irudikatzen du. Lerro organiko hori honela definitu zuen artistak: “kolore bereko bi gainazal lau bata bestea ukituz aplikatzen direnean agertzen den lerroa”. Mihise gainean lerro bat zuzenean margotu beharrean, Clarkek fisikoki eraikitzen du elkarren ondoan dauden bi panel lotuz, eta bien artean bisualki lerro baten moduan funtzionatzen duen zirrikitu txiki bat utziz. Lerro organikoa ez zaio azalerari marka grafiko baten moduan lotzen; aitzitik, bizirik dago, inguruari lotuta, eta harekin elkarreraginean. Margotutako objektuan sartzen den eta, aldi berean, kanporantz, inguratzen duen espaziorantz, zabaltzen den zirrikitu hori esploratzera gonbidatuta gaude ikusleok, horrela obraren esperientzia murgiltzaileagoa eta parte-hartzaileagoa sortuz.
1956an, lerro organikoaren kontzeptuari buruz mintzatu zen Clark bere jaioterriko, Belo Horizonteko, Arkitekturako Eskola Nazionalean. Lerro organikoaren aurkikuntza mundu errealari egindako behaketetatik eratorria zela azaldu zuen, ateen lerro funtzionalen, arroparen josturen eta azalera oso bat modulatzeko materialen loturen behaketatik adibidez. Pentsamendu arkitektonikoa arte ederren berezko prozedura piktorikoetara eraldatzeko transposizio hori, eta elementu eraiki edo espazialen justaposizioa oinarrizko elementu bihurtu ziren Clarken geroko obran.