Urte eroak, 1920ko hamarkada

Iruzkinak

Moda

Hain ezaguna den 1920ko hamarkadako moda Paul Poiret, Coco Chanel eta Madelaine Vionnet bezalako izenekin lotzen da. Paris laster bilakatu zen nazioarteko goi-mailako joskintzaren hiriburu. Soinekoen luzera moztu zen eta azpildurak goranzko bidea jarraitu zuten hamarkada aurrera zioan neurrian. Aldi berean, gerriak gehiago markatu ziren eta mahukak geroz eta motzagoak ziren. Moda-diseinatzaileek modu erabakigarrian aldatu zituzten soinekoen diseinuen formak, "emakume profesional berriari" mugikortasun gehiago ahalbidetuz.

Paul Poiret izan zen bere joskintza-etxearen marka bere sormen pertsonalarekin modu askaezinean lotu zuen lehenengo diseinatzailea. Goi-mailako joskintza sormen artistiko ekintza bihurtu zuen. Horrek Raoul Dufy bezalako artistekin elkarlanean aritzea ondorioztatu zuen. Lankidetza honi esker Dufyk estetika kubistarekin eten egin zuen eta irudimenez betetako estanpatu sofistikatuak sortu zituen.

1920ko hamarkadaren erdialdean, Coco Chanel eta Madeleine Vionnet bezalako diseinatzaileek egitura atletikoa eta androginoa zuten emakumeentzako arropak sortu zituzten, konbentzio tradizionaletatik askatuz. Chanel modaren historiara pasatu zen little black dress (soineko beltz txikia) delakoarekin eta beltza, doluaren kolorea, joera bihurtu zuen. 1926anVogue aldizkariak adierazi zuen Little black dress soinekoa “gustu oneko emakume guztientzako uniforme" bihurtuko zela.

Madeleine Vionnet-ek edertasunaren ikuspegi denboragabea zuen Parisko Palais Galliera-ko soinekoan ikus daitekeen moduan. Bazirudien bere soinekoek bizitza propioa zutela, soinean zeramatzaten gorputzak zigarro-kez inguratuta egongo balira moduan, kearen kiribilak imitatuz. Vionnet oihalak zeharka mozten hasi zen, eta gaur egun ere goi-mailako joskintzan ehun dotore eta arinak lortzeko teknika garrantzitsuenetako bat da oraindik.