Urte eroak, 1920ko hamarkada

Iruzkinak

Ehunak

XIX. mendean emakumeentzako jantziak eta gizonentzako gorbatak ekoizteko luxuzko ehunen bigarren ekoizpen-gune garrantzitsuena bihurtu zen Zurich, zetaren hiriburua zen Lyon eta gero. Industria esportaziora bideratuta zegoen hein handi batean eta Suitzaren oparotasunaren suspertzailea izan zen, bankuak, industria farmazeutikoa edo aseguru-etxeak baino askoz lehenago. Aduanak saihesteko, Zuricheko familiek azkar eraman zuten produkzioa beste herrialde batzuetara. Lehen Mundu Gerraren aurretik ere, Zuricheko zetaren industriak ehungailu gehiago zituen atzerrian Suitzan baino.

Modaren sektorean arrakasta edukitzeko ez da nahikoa kalitate oneko produktua edo kostu ekonomiko egokikoa izatea, modaren joerei aurrea hartzeko gaitasuna ere oso garrantzitsua da. Jean Claude Frères estanpatuen enpresa paristarrak esate baterako, Parisen modan zeuden ehunen laginak eskaintzen zizkien bezeroei. Lyongo tindagaien industria zen koloreei zegokionez azken moda zein zen jakinarazteaz arduratzen zena.

Stehli Silks Corporation enpresa ezaguna da artea eta ehungintzaren-diseinua modu berritzailean uztartzeagatik. 1925 eta 1927 artean, zuzendari artistikoak enkarguak egin zizkien sortzaile estatubatuar ezagunei argazkietan oinarritutako diseinuak burutzeko, hala hola, Edward Steichen argazkilariari. Steichen-ek naftalina boleei eta azukre-koskorrei, eta haiek sortutako itzalei argazkiak atera zizkien. Emaitza, Sitsaren kontrako bolak eta azukre-koskorrak izenarekin ezagutzen den ehun-estanpatua izan zen. Horrela sortu zen nazioartean zirrara sortu zuen estanpatu iraultzaile hori eta Steichen "arte eskola industrial" berriaren sortzailea bilakatu zen. Stehli Silks Corporation konpainiaren Americana Prints estanpatuek hornitzen zuten merkatu estatubatuarra eta, aldi berean, artea ezagutzera ematen lagundu zuten, estilo aparta eta pertsonalarekin.