Budapesteko paper gaineko maisulanak

Iruzkinak

1989ko trantsizio politikoaren aurretik eta ondoren

Bigarren Mundu Gerraren ondoren, Sobietar Batasunaren eragin politiko eta militarraren pean geratu zen Hungaria. Kontrol politikoa kulturgintzara ere iritsi zen, eta erakundeek ideologia sozialista transmititzeko eginkizun garbia zuten.

1950eko hamarkadako politika kulturalak nazioarteko artea eta hungariar artea bereiztea izan zuen xede. Dena den, Arte Ederren Museoaren garai hartako egoitzaren ezaugarri fisikoen ondorioz, ezinezkoa zen banaketa hori aplikatzea. Horrenbestez, trabei aurre egiteko, hungariarrak ziren piezak eta Hungariarekin zerikusia zutenak erakunde independente batera eraman zituzten: Hungariako Galeria Nazionalera, alegia. Galeria Nazionala 1957an sortu zuten Kuriaren egoitza izandako eraikinean; 1975ean, berriz, garai bateko errege-jauregira eraman zuten, Budako gaztelura, eta hantxe dago gaur egun. Galeria Nazionalaren Estanpa eta Marrazki Sailak 54.000 marrazki eta 31.000 grabatu inguru gordetzen ditu.

Arte Ederren Museoan, berriz, Iván Fenyő izan zen Europako Estanpa eta Marrazki Bildumaren arduraduna 1955 eta 1970 artean. Aldian-aldian, Budapesteko Museoak baimena izaten zuen objektuak maileguan emateko Mendebaldean egindako nazioarteko erakusketetan ikusgai jar zitezen, eta Mendebaldeko erakusketen egoitza ere izan zen, esate baterako, Vienako Albertinarekin 1966 eta 1967an egindako truke-erakusketa garrantzitsuaren kasuan.

1980ko hamarkadan, sozialismoak eragina galdu zuen Hungarian. 1989an, Berlingo Harresiaren eraisketak eta Ekialdeko Blokea deiturikoaren gainbeherak kapitulu berria ireki zuten Bildumaren historian.

2003tik aurrera nazioarteko harremanak zabaltzen hasi ziren Budapesteko Museoaren Monet eta lagunak izeneko pintura-erakusketarekin. Hungarian ikusle-andana bildu zuen lehenbiziko erakustaldia izan zen hura. Harrezkero, erakusketa ugari egin dira nazioarteko lankidetza zabalarekin.

Esterházy Bilduma jabari publikoko bilduma bihurtu zenetik igaro den 150 urtetik gorako tartean, Estanpa eta Marrazki Bilduma handituz joan da, eta jatorrian zena baino hainbat bider handiago izatera iritsi da museologo, museo-zuzendari eta emaileek genero horri eskainitako gogo eta dedikazio nekaezinari esker.