Anni Albers: Ikusmena ukitu
[Anni Albers: ikusmena ukitu]. Sarrera
Egin gabeko oihal zintzilikarirako zirriborroa (Study for Unexecuted Wall hanging, 1926)
Iruzkinak
Oihal zintzilikaria (Wall hanging, 1924)
- Izenburua:
- Oihal zintzilikaria (Wall hanging, 1924)
- Erakusketa:
- Anni Albers: Ikusmena ukitu
- Gaiak:
- Erritmoa | Forma | Geometria | Kolorea | Bauhaus Eskola
- Mugimendu artistikoak:
- Arte Abstraktua
- Artelan motak:
- Tapiza
- Aipatutako artistak:
- Albers, Anni
XV. mendetik aurrera, tapiza edergailu gisa hartu zuen ehungintzazko industria europarrak, errege-jende eta handikien jauregietako apaingarritzat, alegia. Luxuzko ehunak xehetasun handiz egiten ziren; lehenik kartoia margotzen zen, eta gero artisauek oihala ehuntzeko erreferente gisa baliatzen zuten. Hala eszena historikoak, mitologikoak, paisaia konplexuak eta abar egiten zituzten, beti ere margolaritza imitatuz eta erabilgarritasun asmoarekin: aretoetako berotasunari eustea.
Anni Albersen lan hau ere tapiza da eta, haiek bezala, erabilgarritasuna du helburu. Halabaina, gainerako ezaugarriei erreparatuta, haustura dakar, ehungintza-lan tradiziozkoen baloreak azpikoz gora jartzen baititu.
Albersek uko egiten dio diseinua egiten duen artistaren eta pieza lantzen duen artisauaren artean desberdintasuna ezartzeari. Gainera, arbuiatu egiten du margolan figuratiboek gauzatzen duten errealitatearen imitazioa. Bere garaiko artegintzan gertatzen ari zen modu berean, artegileak hausnarketa egiten du bere diziplinan oinarrizkoak diren tekniken eta materialen inguruan. Kasu honetan, ehungintzaren adierazpena: hariak, irazkia eta bilbea.
Albersek harien berezko ezaugarriekin jolasten du: testurarekin eta kolorearekin. Aldi berean, irazkia eta bilbea erabiliz artelana konposaketak bultzatuta, ehunaren ohiko egiturarekin eta eskema errepikakorrekin lan egiten du.
Osagai horiekin, figurazio asmorik gabeko konposizioak diseinatu eta egiten ditu. Haren tapizak forma, kolorea, geometria eta erritmoen gaineko hausnarketa dira. Eta hausnarketa hori haren garaiko artegintza osoaren hausnarketaren parez pare dabil, abstrakzioaren bidetik.
Izan ere, Bauhausen egon zeneko heziketa aldian egindako lanetakoa da hau. Hasieran diziplina honekiko interes berezirik erakutsi ez bazuen ere, eskolako ehungintza tailerrean sartu bezain pronto nabarmendu zen artista, beste ikaskideen artetik. Tailer hartan tamaina handiko lanak egiten ziren, aurrean dugun honen modukoak, beti ere baliagarritasun eta esperimentazio formalaren bidetik.