Anni Albers: Ikusmena ukitu
Ehun-lagina, 1949
Anni eta Josef Albersek Peru eta Mexikora egindako bidaietako lagin eta dokumentazioa, kolonaurrekoa
Iruzkinak
La Luz I (1947)
- Izenburua:
- La Luz I (1947)
- Erakusketa:
- Anni Albers: Ikusmena ukitu
- Gaiak:
- Geometria | Kolorea | Kolonaurreko kulturak
- Teknikak:
- Bilbe brokatu erantsiak
- Artelan motak:
- Tapiza
- Aipatutako artistak:
- Albers, Anni
Bilbearen hariek eratzen dituzten zerrenda arinek patroi geometrikoa ekartzen dute gogora kolore desberdinez: irudi bat. Hondotik sortuko balitz bezala, era lausoan, zalantza eragiten digu haren izaeraren inguruan: gurutze bat ematen du, erdiko besoa oso zabala duela; baina iradoki lezake, baita ere, txori baten gorputza, hegalak zabalduta. Beharbada, amerikar jatorrizko kulturen hegazti sakratuen oroitzapena da, edo tradiziozko pontxoa. Lan honetan, guztiak ekartzen ditu gogora kultura haiek: bai animalia sakratuak, baita ehunaren teknika eta koloreek ere.
Lan hau egiteko, bilbe brokatu erantsiak erabili zituen Anni Albersek, Andeetako ehungintzaren teknika-oinordekoa. Bilbe horiek behin eta berriro ateratzen zituen artistak ehunaren azalera. Era horretan, lanaren motibo grafikoa nabarmentzea lortzen zuen. Koloreen konbinazio sotila, malba eta urreen kontrastea, zerrenda etzanen fintasunari gehitzen zaio. Osagai horiek protagonismo handiagoa hartzen dute, iradokitzen duten irudiak berak baino. Berriro ere, formen eta koloreen arteko harremanak garrantzitsuagoak dira Albersentzat, irudiak sortzeko duten gaitasuna baino. Haren ehunek begirada libre uzteko gonbita egiten digute, xehetasun guztien bila. Horrela, pertzepzio-modu meditatiboa, ia erlijiosoa eragiten dute. Hori dela eta, lotura sortzen da haren lanaren eta kolonaurreko irudikatzeen izaera sakratuen artean.
Formatu zabalak eta konposizio zentratuak, zerrenda horizontalak nagusi direla, Andeetako paisaia zabalak eta kolonaurreko arkitektura ekartzen dute gogora. Izan ere, lanaren izenburua La Luz I, Nuevo Mexikoko herri baten izena da. Herri hartan igaro zituzten hainbat hilabete Anni Albersek eta haren senar Josefek, 1946 eta 1947 artean; aldi hartan egin zuen artistak lan hau.