Anni Albers: Ikusmena ukitu

Iruzkinak

Menditsuak I–IV (Mountainous I–VI, 1978)

1963tik aurrera, grabatuaren teknikekin esperimentatzeari ekin zion Anni Albersek. June Wayneren tailerrean hasi zen, Los Angelesen, eta ordutik hainbat litografia eta serigrafia egin zituen. Ekoizteko prozesuak ezagutu zituen, bai eta eskura zituen material eta teknikak, eta haien erabilera eta ahalmen estetikoa ere: hainbat tintaren erabilera, irudi inbertituak lortzeko aukera, azidoen eragina plantxen gainean…

Haren jarduera beti zihoan haratago. Ehungintzarekin egin zuen modu berean, lengoaia erabat menperatzea bilatzen zuen Albersek, lengoaia horri zukua ateratzeko, teknika bakoitzak ekar zezakeen formaren mamia lortzeko. Bauhauseko ikasle fina izaki, ez zion uko egiten prozedura mekanikoak erabiltzeari: aitzitik ere, ahalik eta gehien ikertu nahi izaten zituen, haiek eskaintzen zioten guztia lortu ahal izateko.

Ildo horretatik, 1973an bere etxe ondoan offset inpresioa egiten zuen inprimategi industrial batekin hasi zen lanean. 70 urte baina gehiago zituen ordurako, baina beti ere ikasten jarraitzen zuen. Inprimatze modu horretatik, bere diseinuak erreproduzitzeko eskaintzen zion zehaztasuna onesten zuen bereziki.

1978an tintarik gabeko grabatu sail hau egin zuen. Estanpazio izeneko teknika baliatu zuen horretarako: moldea azal baten gainean presionatuta lortzen da emaitza. Moldeak dituen hutsune eta erliebeak negatiboan grabatzen dira, eta horiexek sortzen dituzte formak. Bitxikeria dirudi baina, grabatu hauei Menditsuak izena eman zien. Ez bakarrik haien erliebeengatik, baizik eta bertan erreproduzitzen zituelako triangelu, trapezoide eta erronboide formak, lerro horizontal eta zeharrekoen bidez lotuak, erritmo progresio batean. Formen sail horrek mendi kateen abstrakzioa dirudi.