Claes Oldenburg: hirurogeiko hamarkada

Iruzkinak

Sagu geometrikoa, 1971

Oldenburg-en lilura Mickey Mouse-ren irudi ikoniko eta guztiz ezagunarekin 1963an hasi zen, poster bat diseinatu zuenean Los Angeleseko erakusketa bat egiteko. 

Oldenburgen eskuetan, irudia bi gauza bihurtzen da bakar batean. Lehenengoa belarri erraldoiko saguaren marrazkia da, mito bihurtua. Bigarrenean, aldiz, Mickey Mouseren belarriak itxuraldatu egiten dira, zinema kamera zahar baten profila hartuz, kaxa karratua eta bi pelikula bobina dituela.

Mickey, hasierako entretenimendu-industriaren pertsonaiarik ezagunena, agian da estatubatuar pop kultura errazaren ikur nagusia. Marrazki bizidun honekin duen lilura azaltzeko, artistak dio “saihestezinaren aurrean amore eman zuela”. 

Sagua Oldenburgen alter ego modukoa da, eta mota guztietako testuinguruetan erabili du, antzerkiko performanceetan eta eskala handiko metalezko eskulturetan, besteren artean. Oldenburgek azaltzen du irudien eskalak gure pertzepzioa nabarmenki aldatzen duela. Neurri desberdinak sailkatu ditu:

“Sagu geometrikoaren forma sinpleena ondo egokitzen zen eskala askotara, horietako batzuk objektu tipikoak ziren. Adibidez, B eskalak triziklo baten tamaina du; C eskala, aldiz, burezur baten modukoa da (memento mori) edo esku-kamera baten modukoa, izan ere, antzekoa da kolorean, egituran eta xehetasunetan. B, C eta D eskalek belarri artikulatuak dituzte; baita betazalak eta sudurrak ere. Horri esker, Sagu geometrikoa zenbait modutan jar daiteke, nahiz eta posizio “klasikoa” gomendatua egon.

Saguaren eskala zenbat eta txikiagoa izan, orduan eta gehiago handitzen da kopurua, egiazko saguen ugalketa arinaren adierazgarri”.