Max Beckmann: urmargoak eta pastelak

Iruzkinak

Marie Swarzenskiren erretratua

Hemen ikusten den emakumeak itxura isila du, eta ezerezera begira dago. Argi indartsuak itzalak sortzen ditu haren aurpegian eta lepoan, eta espazioa anbiguoa da. Horrela erretratatu zuen Max Beckmannek Marie Swarzenski, Frankfurteko goi gizarteko kidea. Georg Swarzenskiren emaztea zen. Städel arte institutu ospetsuko zuzendaria izan zen Georg Swarzenski 1906tik 1937ra bitartean. Haren zuzendaritzapean, institutuan noranzko aldaketa nabarmena gertatu zen, eta garai horretako erosketa eta dohaintzak ugari eta oso garrantzitsuak izan ziren. Swarzenskik Beckmannen Eraistea lana erosi zuen 1918. urtean. Lan hori Lehen Mundu Gerrako esperientziaren lekukoa da. Gero, hari batu zitzaizkion Frankfurteko Niza pintura, Inauterietako erretratu bikoitza, Natura hil handia saxofoiarekin eta artistaren beste hainbat pintura.

1927an, Beckmannek Marie Swarzenskiren erretratua egin zuen pastel pintura honetan. Garai hartan 12 urte zeramatzan Frankfurten bizitzen. Städeleko irakaslea izan zen, eta itzal handia izan zuen Alemania osoan. Bere erretratuak asko eskatzen ziren. Mayen Beckmannek pastelak maiz erabiltzeari buruzko gogoeta egiten du:

Mayen Beckmann:

... 1927 inguruan ohartu zen pastela baliabide alternatibo gisa erabil zitekeela erretratuak egiteko. Hori baino lehen, eta gero, lanak olio-pinturaz margotzen zituen, baina aldi labur honetan konturatu zen pastela saltzeko moduko erretratuak egiteko nahiko era bizkorra zela. Nire ustez, faktore ekonomikoek eragina izan zuten horretan. Hartara, pinturak erosteko dirurik ez zuten pertsonek ere erosi ahal zituzten. [...] Oinarria iluna da beti, eta marko eskematikoa eratzen du oso pintzelkada bizkorrekin. Gero, oso aurpegi eta lepo nabarmenak sortzen ditu pastel koloreekin, eta, batzuetan, nolabaiteko hondoa ere margotzen du.

Marie Swarzenski eta senarra Ameriketako Estatu Batuetara joan ziren bizitzera 1938an. Arterako hurbilketa modernoak defendatzen zituztenek, etsaiak zituzten 1930eko hamarkadaren hasieratik. Izan ere, 1937an, Alemaniako museoetatik milaka arte lan moderno konfiskatzearekin eta Municheko Arte Degeneratua erakusketarekin bat, Naziek euren helburua lortu zuten: euren ikuspegia gurtu nahi ez zutenei alde egitea beste aukerarik ez zitzaien geratzen. Beckmann Amsterdamera joan zen.