Chagall. Urte erabakigarriak, 1911−1919
Marrubiak edo Bella eta Ida mahaian (Les fraises ou Bella et Ida à table), 1916
Gerrara abiatzea (Le départ pour la guerre), 1914
Iruzkinak
Maitaleak urdinez (Les amoureux en bleu), 1914
- Izenburua:
- Maitaleak urdinez (Les amoureux en bleu), 1914
- Erakusketa:
- Chagall. Urte erabakigarriak, 1911−1919
- Gaiak:
- Kolorea | Maitasuna
- Artelan motak:
- Pintura
Marc Chagall eta Bella Rosenfeld berriz elkartu izana inspirazio iturria izan zen bikotearen erretratu sail baterako; horietan, buruak elkarren gainka eta gorputzak elkar-lotuak agertzen dira. Hau bihurtu zen artistak gehien irudikatu zuen gaietako bat, autorretratuekin eta Vitebsk-eko eszenekin batera.
Bikotekideak agertzen direneko erretratu sail oso bat dago, motibo horren gaineko aldaera kromatikoetatik abiatuta: maitale urdinez gain, gai horren aldaerak egin zituen Chagallek arrosa, berdea edo grisa erabiliz, bere sorterrira itzuli zeneko hasierako urteetan.
Lan hau [Maitaleak urdinez, 1914] protagonisten ezkontza baino urtebete lehenago egin zen, eta saileko lehenengoa da. Hau irudikatzeko, Artearen Komediako bi pertsonaia aukeratu zituen artistak: Arlekin eta Kolonbina. Artearen Komedia, izatez herrikoia eta sorrera ezezagunekoa, arrakasta handikoa izan zen Italian XVI. eta XVII. mendeetan, eta ohikoa zen pertsonaia arketipikoak eta intrigazko egoerak agertzea bertan, aukera ematen zuelako eszenak nahiz elkarrizketa barregarri eta satirikoak inprobisatzeko.
Bai Arlekin, bai haren maitale Kolonbina ere, pertsonaia arinak eta dibertigarriak ziren, “zerbitzarien” taldekoak, ez nagusien taldekoak. Mutila komikoa zen, erarik eskasenean jositako zarpa batzuez jantzita ibiltzen zena. Denbora igarota, haren jantziak gaur ezagutzen dugun erronbozko jantzi bihurtu ziren. Batzuetan, Kolonbina Arlekinen ezaugarriekin aurkezten zen, eta hura bezala jantzita. Horrela iradokitzen da margolan honetan, non Bellaren jantziaren estanpatu geometrikoa nabarmentzen den.
Chagall profilez ageri da, Bellaren besoetan, intimotasun handiko une batean, gama kromatikoaren xehetasunen leuntasunak iradokitzen duen moduan. Gau urdin baten kolore samurrean bilduta, maitaleen gorputzek eurek argia dutela dirudite. Elkartutako buruen formak bihotz baten figura sinbolikoa eratzen du, eta euren ezpainak aho bakar batean biltzen dira.