Haunted: egungo argazkigintza-bideoa-performancea
Paisaia, arkitektura eta denboraren joana
Atalak
Haunted: egungo argazkigintza-bideoa-performancea
- Izenburua:
- Haunted: egungo argazkigintza-bideoa-performancea
- Erakusketa:
- Haunted: egungo argazkigintza-bideoa-performancea
- Gaiak:
- Artea eta denbora | Artea eta emozioa | Artea eta teknologia
- Mugimendu artistikoak:
- Arte Garaikidea
- Artelan motak:
- Argazkia | Bideoa | Eskultura | Ikus-entzunezkoa | Instalazioa | Pintura | Soinu-artea
Fonografoak, kaseteak, argazkigintzak, zinemak eta bideoak, esaterako, hau da, entzunezko eta irudi estatikodun zein mugimendudun ikusizko baliabideek, ahalmen ia magiko bat eskaini digute: emanaldi efimero bat edo aspaldi hildako pertsona bat ikus eta entzun ditzakegu, zuzenean balitz edo bizirik balego moduan. Hala ere, edonolako grabazioek denboraren joana eta oroimenaren saiheskortasuna gogorarazten digute. Erreprodukzio-baliabideek iragana nola ikusten dugun eraldatu dute eta historiari heltzeko bide berri bat ireki digute, baina, aldi berean, joan den horretatik aldendu gaituzte, modu berri batean, modu asaldagarrian.
Egungo argazki eta bideo ugari mamuek sorgindu dituztela ematen du; izan ere, mamu horiek grabazioetan, zuzeneko performanceetan eta giro birtualean azaltzen dira. Arte horrek, zaharkitu diren gaien eta teknologien bidez, beste edonola berreskura ezin daitekeen iraganera heltzeko grina adierazten du. Haunted erakusketak argazki- ikonografia orain gutxiko artean nola uztartzen den ikertzen du eta prozesu horretan grabatze-modu guztiei darien indar berezia eta malenkonia azpimarratzen ditu. Era berean, bai taldeen bai banakoen artean iraganarekiko obsesio hori zabaldu dela agerian jartzen du. Ikusgai dauden artelanak askotarikoak dira: argazki bakunak, argazki-sailak, eskulturak, pinturak, argazkigintzako osagaiak dituzten kokapen zehatzeko instalazioak, bideoak, filmak eta audio-grabazioak.
Horietako asko 2001etik aurrera sortu ziren arren, erakusketak 1960ko hamarkadatik aurrera argazkigintza artean nola txertatu den azaltzen du, beti ere ardatz nagusi dela denboraren joanaren eta irudiak eta entzunezkoak erreproduzitzeko askotariko baliabideen arteko lotura.
Haunted erakusketak ildo formal eta kontzeptual batzuk jarraitzen ditu eta ikusgai dauden artelanetan zehar agerian jartzen dira; artelan gehienak Guggenheim Museoen Bilduma Iraunkorrarenak dira.