Irudiak mugimenduan. Guggenheim museoetako bildumako gaur egungo argazkiak eta bideoak
Iñigo Manglano-Ovalle, Glenn, Dario eta Tyrone, Gozamenen lorategia seriekoa
Thomas Demand, Artxibategia (Archive)
Iruzkinak
James Casebere, Eroetxea (Asylum)
- Izenburua:
- James Casebere, Eroetxea (Asylum)
- Erakusketa:
- Irudiak mugimenduan. Guggenheim museoetako bildumako gaur egungo argazkiak eta bideoak
- Gaiak:
- Artea eta espazioa | Artea eta emozioa | Sorkuntza artistikoa | Argia | Fikzioa eta errealitatea
- Artelan motak:
- Argazkia
- Aipatutako artistak:
- Casebere, James
Eroetxea James Casebere argazkilari iparramerikarrarena da, 1994an egina. Irudi harrigarria da, eroetxe erreal baten argazkia ematen badu ere artistak bere estudioan eraikitako eta mahai gainean jartzeko moduko tamaina duen maketa baten argazkia baita. Caseberek kolore bakar batez egin zuen maketa, xehetasunak eta giza irudiak saihestuz. Ondoren, espazio huts horiek giroa emateko argi sotil batez argiztatu zituen, gainazal leunei bizitasuna emanez, eta azkenean maketaren argazkia egin zuen, espazio misteriotsu bezain eder hau sortzeko irudia handiagotuz.
Casebere argazkiak sortzeko eszenaratzeak erabiltzen dituzten artisten belaunaldikoa da. Argazkiak egiteko eszenatokiak eraikitzean argazkiaz dugun ikuspegia aldarazten du, egia kontatzen digun baliabidea dela uste dugun aldetik –errealitatea bakarrik erakusten duen baliabidea–. Caseberek nahiago du errealitatearen eta fikzioaren arteko lerroa lausotu. Errepresentazio literala izan beharrean, bere obrak erantzun emozional bat eragiten du. Eroetxe baten irudi hau XVII. eta XVIII. mendeetako instituzioen historiak, adibidez, kartzela, eskola, eroetxe eta ospitaleenak artistarengan piztutako interesaren erakusgarri bat dugu, baita leku horien historiak aipatutako instituzioei buruz orain dugun ikuspegian izan duen eraginarena ere. Irudi hau behatzean eroetxeen inguruan ditugun ideiak gogora ekartzen ditugun arren, areto huts hau, lasaia bezain arraroa, leku sakratu bat edo kartzela bat izan liteke baita ere. Irudiaren beste irakurketa bat egin daiteke. Barrualde hau kamera baten objektiboan zehar ikusteko eraiki zen propio. Baina irudia argazkigintzaren mekanismoarekin ere konpara daiteke. Kartzelako gela kameraren kaxa litzateke eta, leihoa, argia barrura sartzen uzten duen obturadorea.