Irudiak mugimenduan. Guggenheim museoetako bildumako gaur egungo argazkiak eta bideoak
Thomas Struth, Richter familia I, Kolonia (The Richter Family I, Köln)
Wolfgang Tillmans, Guggenheim Installation
Iruzkinak
Nan Goldin, Greer eta Robert ohe gainean, New York (Greer and Robert on the bed, NYC)
- Izenburua:
- Nan Goldin, Greer eta Robert ohe gainean, New York (Greer and Robert on the bed, NYC)
- Erakusketa:
- Irudiak mugimenduan. Guggenheim museoetako bildumako gaur egungo argazkiak eta bideoak
- Gaiak:
- Generoa eta sexualitatea | Giza harremanak | Artea eta emozioa | Sorkuntza artistikoa | Erretratua eta autorretratua | Sentimenduak | Bakardadea | Indarkeria
- Artelan motak:
- Argazkia
- Aipatutako artistak:
- Goldin, Nan
Nan Goldin argazkilari iparramerikarrak 1982an egin zuen argazki hau, Greer eta Robert ohe gainean izenburua duena. Artistaren bi lagunen eszena informal bat da. Lotsagabe eta kamerara ohituta agertzen dira, artistari beren harremanaren urrakortasuna eta ziurgabetasuna jasotzen utziz. Goldinek erretratua egin dien lagunen egoera emozionala nabarmendu du, kameraren fokatze itxiaren eta intimoaren bidez eta urre koloreko argi batez estaltzen dituen argiztapen haragikoiaz eta dramatikoaz.
Argazki hau Goldinek zenbait urtetan egindako serie batekoa da, Mendetasun sexualaren balada (The Ballad of Sexual Dependency) izenburua duen seriekoa. Jatorriz diapositiben proiekzio bat zen, etengabe aldatzen ziren ehunka irudiez osatutakoa, beren esanahia nabarmentzen zuen soinu-bandarekin batera. Erakustaldiak bere lagunen bizimodu eta harreman ausartak dokumentatzen zituen, artistak bere “familia sortutzat” definitu zituen haienak, New Yorkeko klubak bete ohi zituzten artista, zinemagile, trabesti eta drogazaleez osatutako familiarenak, alegia. Bere argazkiak bizitzatik zuzenean sortutakoak dira baita bizitza jasotzeko bere premia obsesibotik ere, eta egunkari pertsonal antzeko bat dira. Mendetasun sexualaren balada harreman sexualetan oinarritzen da bereziki. Seriea ustez pozik dauden bikoteei eskainitako sail batekin hasten bada ere, pixkanaka biolentzia, bakardadea eta alienazioa barneratzen doaz. Seriea ohe hutsekin eta hilobi pareekin amaitzen da.
Goldinek giza harremanak zehazten dituzten funtsezko indarretako batzuk ikertzen ditu eta bereziki askatasunaren eta mendetasunaren arteko borroka unibertsala. Borroka hori konplikatu egiten da genero-rolek eraginda. Goldinen obrak, eta batik bat bizi izan zen eta harremanak izan zituen drag queenen irudi zintzoek, behin betiko askatasuna beharbada genero-rol horiek berriro definitzean aurki daitekeela iradokitzen digute.