Irudiak mugimenduan. Guggenheim museoetako bildumako gaur egungo argazkiak eta bideoak
Nan Goldin, Greer eta Robert ohe gainean, New York (Greer and Robert on the bed, NYC)
Iruzkinak
Wolfgang Tillmans, Guggenheim Installation
- Izenburua:
- Wolfgang Tillmans, Guggenheim Installation
- Erakusketa:
- Irudiak mugimenduan. Guggenheim museoetako bildumako gaur egungo argazkiak eta bideoak
- Gaiak:
- Artea eta denbora | Artea eta espazioa | Artea eta pertzepzioa | Sorkuntza artistikoa | Materiala | Erretratua eta autorretratua | Natura hila | Paisaia
- Artelan motak:
- Argazkia | Instalazioa
- Aipatutako artistak:
- Tillmans, Wolfgang
Instalazio hau Wolfgang Tillmans argazkilari alemanarena da. Bertan, Tillmansek genero desberdinak konbinatu ditu, esate baterako lagunen erretratu intimoak, natura hilak eta hiriko paisaiak. Gainera, baliabide desberdinak konbinatzen ditu, bere argazkiak produkzio komertzialeko postalekin eta aldizkarietako orrialdeekin nahastuz.
Argazki desberdinak 1991 eta 2000 urte bitartean egindakoak badira ere, Tillmansentzat argazkiak egitea prozesuaren lehenengo partea besterik ez da, instalazioa argazkia bezain garrantzitsua baita beretzat. Artistak berak instalatzen ditu irudiak galeriaren espazioan, paretan zinta eransgarriaz zuzenean erantsiz.
Argazkiekin areto baten testuinguruan lan egiteko modu berritzaile eta pizgarri honek era guztietako galderak planteatzen ditu. Irudi-mota desberdinak, zaharrak eta berriak nahasteak ikuslea irudi horiek taldean aztertzera behartzen du, ez ordea banakako obra soilak bezala. Multzoa behatuz, irudi ugariek bizitza bat osatzen duten gertaeren eta esanahien sare konplexua gogorarazten digute, eta instalazioa existentziaren argazki-collage antzeko zerbait bihurtzen dute. Argazkiak taldean aurkezteak irudi baten esanahia bere testuinguruaren menpe dagoela eta ondoan duenaren arabera edo ikuslearen beraren esperientzien arabera alda daitekeela azpimarratzen du baita ere. Azkenik, argazkiak esekitzeko erabilitako zinta eransgarriaren metodo bakun horrek behin-behinekotasun sentsazioa sorrarazten du instalazioari dagokionez. Obrek izaera hauskorra eta iragankorra hartzen dute, ikusmen esperientziaren bat-batekotasuna ahalmen handiz areagotuz.