Irudiak mugimenduan. Guggenheim museoetako bildumako gaur egungo argazkiak eta bideoak
Rineke Dijkstra, Kolobrzeg, Polonia, 1992ko uztailaren 27a (Kolobrzeg, Poland, July 27, 1992)
Thomas Struth, Richter familia I, Kolonia (The Richter Family I, Köln)
Iruzkinak
Andreas Gursky, Liburutegia (Bibliothek)
- Izenburua:
- Andreas Gursky, Liburutegia (Bibliothek)
- Erakusketa:
- Irudiak mugimenduan. Guggenheim museoetako bildumako gaur egungo argazkiak eta bideoak
- Gaiak:
- Artea eta espazioa | Artea eta emozioa | Sorkuntza artistikoa | Kapitalismoa | Fikzioa eta errealitatea | Bakardadea
- Artelan motak:
- Argazkia
- Aipatutako artistak:
- Gursky, Andreas
Andreas Gursky argazkilari alemanaren obrak ikuspegi dokumentala du nolabait ere, bizi garen mundua islatzen baitu. Adibidez, 1999ko argazki honetan Stockholmeko liburutegi publikoaren ikuspegi panoramikoa erakusten digu. Hala ere, Gurskyren obra dirudiena baino konplexuagoa da. Bere argazkiek ikuspegi inpertsonala eta objektiboa eskaintzen dutela iruditu arren, Gurskyk digitalki manipulatzen ditu irudiak, gai beraren ikuspegi desberdinak konbinatuz, azaleko xehetasunak ezabatuz eta koloreak nabarmenduz. Hemen, adibidez, apal erdizirkularren hedadura perfektua erakusten digu, koloreen arabera kodetutako liburuez beteak. Izan ere, Stockholmeko liburutegi publikoak simetria perfektu hori ezinezko bihurtzen duen eskailera mekaniko bat du. Hala, Gurskyk zoru guztia ezabatu du irudi hau lortzeko. Ikuspegi dokumentalaren itxuraldatze sotil bat da. Jakin dezakegu irudia manipulatu egin duela, baina ez dakigu zeintzuk diren aldatu dituen elementuak. Modu probokatzaile batez, artistak gure ideia ahuldu egiten du, hain zuzen ere argazkiak egia literala erakusten duelako ideia. Aukeratutako mundua irudikatzen duen modua gehiago dagokio pintore bati argazkilari bati baino. Lantzen duen gaia gizarte kapitalistaren arrakastaren sinboloak dira, hain zuzen ere informazio-zentroak, liburutegi hau esate baterako; bidaia- eta aisiarako zentroak, adibidez hotelak, aireportuak, arte-galeriak eta kontzertu-jauregiak; eta merkatu-ekonomiarekin zerikusia duten lekuen eszenak, adibidez Balioen Burtsak. Eszenatoki horietan ez da jenderik agertzen edo jendea inguruneak murriztu dituela ematen du, eta ederrak eta arranditsuak izan arren obra hauek inpertsonaltasun- eta bakardade-sentsazioa sorrarazten digute.