David Hockney: ikuspegi zabalago bat
Uda, bete-betean: East Yorkshire (Midsummer: East Yorkshire), 2004
Iruzkinak
Sarrera
- Izenburua:
- Sarrera
- Erakusketa:
- David Hockney: ikuspegi zabalago bat
- Gaiak:
- Artea eta denbora | Artea eta teknologia | Ibilbide artistikoa | Sorkuntza artistikoa | Kolorea | Tamaina | Paisaia | Memoria | Ingurunea eta natura | Yorkshire
- Aipatutako artistak:
- Hockney, David
Ongi etorri Guggenheim Bilbao Museora, David Hockney: ikuspegi zabalago bat erakusketara.
Erakusketa hau Londresko Royal Academy of Arts-ek antolatu du, Guggenheim Bilbao Museoarekin eta Koloniako Ludwig Museoarekin lankidetzan. Erakusketaren komisarioak hauek dira: Edith Devaney, Londresko Royal Academy of Arts-eko proiektu garaikideen arte-arduraduna, eta Marco Livingstone, komisario independentea eta idazlea.
David Hockney 1937an jaio zen Bradforden, West Yorkshiren, Ingalaterrako iparraldean. 1964an Los Angelesa joan zen bizitzera, eta laster egin zen nazioartean ezagun Kalifornian hain ohikoa den igerilekuen inguruko bizimodua, erosoa eta aisi girokoa, irudikatzeagatik. Orain, hirurogeita hamabost urte beteak dituenean, naturan jarri du arreta, eta bereziki bere jaioterri Yorkshireko paisaian, grina handiz gainera.
Erakusketa honetan bildutako lan gehienak berriak dira, 2004tik aurrera sortuak. Nazioarteko bilduma publiko eta pribatuetatik aukeratu dira, baita artistaren bildumatik ere. Azken urteetako lanetan, Yorkshire Wolds eskualdeko paisaia miresmenez arakatu du Hockneyk, iraganeko artistek ez bezala; natura-gune eder hori neurri handi batean aztertu gabe geratu zen. Lan horietan urtaro aldaketak eta landareen hazkunde zikloak irudikatu ditu, eta Yorkshireri buruz Hockneyk dituen oroitzapenak ekartzen ditu gogora. Gainera, erakusketa honetan ikusgai dauden azkenaldiko beste lan batzuek agerian uzten dute artistak hainbeste miresten dituen paisaia eta inguru iradokitzaileak etengabe aztertzen jardun duela.
Inguratzen gaituen mundua ikusteko moduan sakontzen du Hockneyk. Erakusketa honetan, formatu eta bizitasun handiko pinturak aurkezten zaizkigu, eta irudikatutako Yorkshireko paisaietan murgiltzen gaitu. Artista honek beste baliabide batzuekin sortutako lanak ere ikusgai daude, teknologia berriak erabiltzeko joera agerian uzteko. Izan ere, hasiera batetik erabiltzen hasi zen Polaroid kamera, eta azkenaldi honetan hasi da iPad gailua eta bideo digitala erabiltzen. Lan guztiek, elkarrekin batera, bidaia bisual erakargarri batean murgiltzen gaituzte, artistaren ikuspegitik. David Hockney: ikuspegi zabalago bat erakusketa IBERDROLAren babesari esker gauzatu da.