David Hockney: ikuspegi zabalago bat
Hockney eta iPad-a
Pearblossom autobidea, 1986ko apirilaren 11–18 1. zk. (Pearblossom Highway, 11−18 April 1986 #1)
Iruzkinak
Bideoak
- Izenburua:
- Bideoak
- Erakusketa:
- David Hockney: ikuspegi zabalago bat
- Gaiak:
- Artea eta denbora | Artea eta pertzepzioa | Artea eta teknologia | Esperimentazio artistikoa | Sorkuntza artistikoa | Argia | Lan-prozesua | Paisaia | Ingurunea eta natura
- Artelan motak:
- Bideoa
- Aipatutako artistak:
- Hockney, David
Hockney-ri izugarri interesatzen zaio teknologia, eta beti ari da bere artelanetan baliabide berriak ikertzen. Bere azkeneko aurkikuntza bideo digitala izan da. Areto honetako filmak bederatzi bideo-kameraz egin zituen. Jeep baten kapotean sareta itxurako egitura bat jarri eta bertan kokatu zituen kamerak, eta atzeko eserlekutik grabaketa-saioa zuzendu zuen, eszena “margotzeko” bederatzi pantailez baliatuz. Era horretan, argi eta egurats onenak jaso zitzakeen. Izan ere, horrexegatik ikus ditzakegu hemen xehetasun guztiak doitasun handiz.
Filmetako batzuek erakusketako beste lan batzuekin lotutako gai bat biltzen dute: ibilbidearena, bidaiarena, alegia. Hockney eta bere laguntzailea autoan bide-tarte batetik poliki-poliki gidatuz grabatu zuten bide-tarte horren aldeetako bat, eta gero, buelta eman eta beste aldea egin zuten. Hemen, elkarrekin jarri ditu emaitzak, bidearen aldeetako baten ikuspegia ezkerraldeko bederatzi pantailetan erakusteko, eta bidearen beste aldeko ikuspegia eskuinaldeko pantailetan. Bideoetako batzuetan, bidean zehar zeuden loreen eta landareen xehetasun botanikoetan jarri du arreta; beste batzuetan, berriz, eszena bera hainbat urtaro grabatu du. Paisaiaren inguruko bideoez gainera, Hockneyk barrualdeak ere filmatu ditu: bere estudioaren barrualdea, esaterako, edo jendea dantzatzen erakusten dizkigutenak.
Hockneyk uste osoa du gure inguruko munduan beti dagoela zerbait gehiago ikusteko. Gainera, jakin-min handia eragiten dio ikusteko moduak. Pantaila anitzek eszena beraren zenbait ikuspuntu erakusten digute, eta ikusmenaren munduan murgiltzen garen moduari buruz pentsarazten digute. Paisaia ez dugu ikusten ikuspuntu lau batetik, argazki batean ikusiko bagenu bezala. Inguratu egiten gaitu paisaiak, eta gure begiak berehala mugitzen dira leku batetik bestera, guztia ikuskatzeko eta geureganatzeko. Horregatik ez digute esaten nora begiratu pantailek: parte-hartzaileak gara hemen, esperientzia bisual batean murgilduta.