David Hockney: ikuspegi zabalago bat

Iruzkinak

Uda, bete-betean: East Yorkshire (Midsummer: East Yorkshire), 2004

Mihise eta paper gaineko lan txiki hauek Hockney orain arte murgilduta egondako proiektu baten erakusgarri dira: berak hainbeste miresten duen Ingalaterrako paisaia irudikatu du.

Irudi hauek 2004. eta 2005. urteen bitartekoak dira, eta bizitik, hau da, irudikatutako inguruan bertan zegoela sortu zituen. Uda, bete-betean: East Yorkshire lan zoragarri hau 36 urmargo txikiz osatuta dago, lan bakarra diren arren. Akuarela bakoitzak irudi bat jasotzen du; hala, osotasunean hartuta, postalen edo argazkien album antzeko bat da. Itxuraz oso interesgarriak ez diren irudien argia eta kolore biziak jaso ditu Hockneyk hemen: soro, landare-hesiak, eta bideak, herriak eta paisaiak zeharkatzen dituztenak. Pintzel busti-bustiaz ondo emandako pintzelkada trebeek belardiak edo hostoz beteak dauden zuhaitzak agerrarazten dizkigute. Uda bete-betean dagoenean irudikatzean, labore-sail zabal eta joriak, uztaldia goren unean dela ospatzen du Hockneyk.

Garai emankorreko irudiak dira hauek. Beste baliabide batzuk denbora-tarte batez erabili eta gero, pinturara itzuli zen, eta urmargoak egitea erabaki zuen, bizitik, hau da, naturan bertan lan egiteko aproposak baitziren: berehala aplikatzen dira, bizkor lehortzen dira eta erraz eraman daitezke leku batetik bestera. Lehendik ere baliatu zen urmargoez, oraingoan, ordea, teknika sakonetik landu nahi izan du. Hasiera batean, Norvegiara, Islandiara eta Espainiara joan zen argi onenaren bila, baina berehala konturatu zen Yorkshire zela benetan erakartzen zuen lekua. Hemen ikusten dituzun paisaia eder eta naturalak muino txikiez osatutako Wolds eskualdekoak dira, East Yorkshiren.

Inguru horietan dago Bridlington. Ingalaterrako ekialdeko itsasertzeko herri horretan, bizi izan zen Hockneyren ama bere azken urteetan, eta artistak ere etxe bat du bertan. Eskualde horrek oroitzapen ugari ekartzen dizkio Hockneyri: mutiko zela, laborari aritu zen; eta, geroago, amarekin txangoak egin ohi zituen. Lan hauetan antzematen da Hockneyk lurralde hori ondo ezagutzen duela, eta halako txera diola.