Hermann eta Margrit Rupf Bilduma

Iruzkinak

Olivier Mosset, Farmazia (1988)

Bere ibilbide artistiko osoan, Olivier Mosset-ek pinturaren aukerak esploratu ditu bere obraren bitartez, errealitate fisikoa irudikatzeko ahalmenetik haratago. Koadro hau ezinbesteko pausoa da bere bilaketa prozesuan.

Laurogeiko hamarkadako erdialdea arte, artistak koadro monokromoak pintatu zituen funtsean eta, bertan, marka pertsonal oro saihesten zuen. Mossetentzat lengoaia piktorikoaren oinarrizko kodea kolorea zen, eta mihise bakoitzean koloreak isolatuki erabiltzen zituen.

Lengoaia piktorikoari buruz zuen kolorearen eta haren mihisearen gainazaleko banaketaren ikuspegi horretatik abiatuz, Mosset beti saiatzen zen objektuen errealitate fisikoari erreferentziarik ez egiten. Horregatik, ahalegintzen zen objekturen bat aditzera eman zezaketen koloreak ez elkartzen.

Irudikapenaren mugak esploratuz, existitzen diren ikurren sistema baliatzen du, eta berak eraldatu egiten du, bere interesei erantzuteko. Ikur horietako bat farmazietako gurutze berdea da, batzuetan ertz gorri bat izaten duena. Artelanak gainazal berde ia karratu bat dauka, baita zerrenda gorri estu bana ere bere hiru ertzetan, gurutzearen zatiki bat izango balitz bezala. Aldi berean, izenburuak interpretaziorako giltza ematen du.

Mosset ez da saiatzen hemen gurutzea bera irudikatzen. Aldiz, unibertsalki ezagutzen den ikur baten koloreak erabiltzen ditu, isolatuz eta konbinatuz, beste irudi bat lortzeko.

Era horretan lan eginez, figuraziotik aparte mantentzen da, baina hurbildu egiten da pinturak esanahiak aditzera emateko daukan gaitasunera. Artistak berak aitortu zuen planteamendu hori anbiguoa dela.

Autonomia, horixe da margolanek lortu beharko luketena, eta hori erabakigarria da bere eraginkortasunerako. Baina oso autonomia mugatua da. Noski badakigu ez direla zerutik erortzen eta, zalantzarik gabe, posible eta ikusgai bihurtu zituzten baldintzen menpe daudela.