Yayoi Kusama: 1945tik gaurdaino
Autorretratua, 1950
Iruzkinak
Sarrera
- Izenburua:
- Sarrera
- Erakusketa:
- Yayoi Kusama: 1945tik gaurdaino
- Gaiak:
- Emakumea artean | Artea eta gizarte iraultza | Arte eta iraultza kulturala | Artearen historia | Eragin artistikoa | Ibilbide artistikoa | Sorkuntza artistikoa | Bizitza | AEB | New York | Japonia | Infinitua
- Mugimendu artistikoak:
- Arte Garaikidea
- Aipatutako artistak:
- Kusama, Yayoi
Yayoi Kusama Japonian jaio zen 1929an, eta arte garaikidearen historiako asiar artista entzutetsuenetako bat da, baita eragin handiena duenetako bat ere. Ikono bihurtu da bere ikuspegi abangoardista irmoari esker.
Azken hirurogeita hamar urteetan, Kusamak ibilbide oparoa eta berritzailea garatu du; estetika nahasezina sortzeaz gainera, bizi-filosofia berezia ere landu du. Yayoi Kusama: 1945etik gaurdaino erakusketak artistaren bizitzaren eta obraren panoramika osoa eskaintzen du, eta aurrez aurre ipintzen dizkigu haren interkonexio-irrika eta haren sorkuntzek existentziari buruz iradokitzen dituzten hausnarketa sakonak. Atzera begirako honek Kusamaren praktika du oinarri, artistak bizi izan dituen testuinguru ezberdinen argitan jarrita, nola diren Japoniako erregimen totalitarioa 1930eko hamarkadan, Pazifikoko Gerra, Ameriketako Estatu Batuek Japonia okupatu zutenekoa, Vietnamgo Gerra, edo eskubide zibilen aldeko mugimendua. Kusamak gogotik egin zuen lan New Yorken aintzatespen artistikoa lortzeko —han bizi izan zen 1958 eta 1973 bitartean—, eta 1980ko eta 1990eko hamarkadetan burbuila ekonomikoak Japoniako artean eta kulturan izaniko ondorioak ere jasan zituen. Era berean, bere garaiko eraldaketa sozial eta kultural sakonak bizi izan zituen, baita hondamendi naturalak ere, hala nola 2011n Japonia astindu zuten lurrikara eta tsunamia, eta gizakiak eragindako gainerako hondamendiak.
Yayoi Kusama: 1945etik gaurdaino erakusketak 200 pieza inguru aurkezten ditu: hasi Bigarren Mundu Gerran egindako lehen marrazkietatik eta obra murgiltzaile berrienetaraino. Erakustaldia kronologikoki eta gaika antolatuta dago, eta artistaren ibilbidea definitzen duten auzi nagusien bidez gidatzen ditu bisitariak. Artistaren beraren arabera, hauexek dira auzi horiek: Infinitua, Metaketa, Konektibitate erradikala, Alderdi biokosmikoa, Heriotza eta Bizitzaren indarra.