Yayoi Kusama: 1945tik gaurdaino

Iruzkinak

Titulurik gabea (Tunika), 1968

Kusamak, ezagun egiteko erabakimenez, beste adierazpide batzuk ere aztertu nahi izan zituen. Probatu zuen metodoetako bat bere moda-marka propioa sortzea izan zen. New Yorkeko kaleetan paseatzen ari zela, konturatu zen Marcstrate Fashions, Inc. enpresak sortutako arropa zeramatela batzuek. Arropa hura bere diseinuen oso antzekoak zen, eta, beraz, harremanetan jarri zen enpresaren jabearekin. Hala, haiekin elkarlanean jardun zuen, eta moda-linea espezializatu bat sortu zuten Kusamaren sorkariekin. Geroago, 1969an, Kusama Enterprises sortu zuen artistak. Bere diseinuek luze gabe lortu zuten ospea, eta Ameriketako Estatu Batuetako 400 denda eta boutiquetan ere saldu zituzten. Bloomingdale’s saltoki handiek, gainera, “Kusamaren txokoa” eskaini zioten haren arropari. 1969ko apirilean, artistak boutique bat inauguratu zuen Seigarren Etorbideko izkina batean, baina ez zen luzaz egon zabalik.

Artistak gorputza margotzeko performanceak egiteko sortutako lau tunika aurkituko dituzu hemen, 1960ko hamarkadaren amaieran eginak. Ikusgai dauden jantziek Infinitu-sare bereizgarriak ageri dituzte, baita Metaketa saileko eskultura bigunetan hain ugariak diren konkor haragitsuak ere. Gainera, aretoaren beste muturrean jarritako monitoreetan ikusgai daude Eztanda anatomikoa saileko performance batzuen grabazioak.

Kusamaren Sare infinitua autobiografian, artistak irizten dio arropak batu egin behar dituela pertsonak, eta ez zatitu. Helburu hori lortzeko, Nude Fashion Company sortu zuen, Kusama Enterprises etxearen filial bat. Haren helburua ideia berritzaileak txertatzea zen, eta horretarako sortu zituen, besteak beste, lozaku baten antzekoa den Couples Dress (Bikote-soinekoa) eta 25 lagunentzako edukia duen Party Dress (Festa-soinekoa). “Moda hori hainbat ekitalditan txertatu nuen”, azaldu zuen artistak, nola ez, bere betiko tanto bereizgarriekin erabat apainduta.