Paris, mende amaiera: Signac, Redon, Toulouse-Lautrec eta garaikideak
Louis Anquetin: Chez Bruant barruan: Le Mirliton (L'intérieur de Chez Bruant: Le Mirliton), 1886-87
Henri-Edmond Cross: Itsas zakarra (La mer clapotante), Ca. 1902-05
Iruzkinak
Pierre Bonnard: Ikuzle txikia (La Petite blanchisseuse), 1896
- Izenburua:
- Pierre Bonnard: Ikuzle txikia (La Petite blanchisseuse), 1896
- Erakusketa:
- Paris, mende amaiera: Signac, Redon, Toulouse-Lautrec eta garaikideak
- Gaiak:
- Genero-margoa | Paris
- Mugimendu artistikoak:
- Akzionismoa
- Artelan motak:
- Litografia
- Aipatutako artistak:
- Bonnard, Pierre
XIX. mende amaierako Parisko emakume askok bezala, neska honek garbitokien industrian lan egiten du. Bere silueta, orban beltz bat baino ez, ia bera bezain handia den arropa zuriz betetako saskiaren pisuak azpiratzen du. Pierre Bonnardek gizarte-kritika egiteko asmorik ez zuen arren, honako hau bezalako lanetan Parisko eguneroko bizitza islatu zuen: kasu honetan, zehazki, ikuztegietako emakume eta neskek egiten zuten lan gogorra azaltzen da.
Halaber, Bonnarden lanaren ezaugarrietako bat da forma eta bolumenak kolore-lauko orbanetara murriztea, xehetasunik gabe. Ezaugarri hori talde artistiko desberdinen pinturan errepikatzen da, sintetisten edo nabien kasuan esaterako; horren asmoa ez da errealitatea antzematen den moduan zehaztasunez imitatzea, baizik eta hura sinplifikatu eta emozio bat irudikatzea. Artista horiek errealitatea irudikatzeko beste forma batzuk bilatzen zituzten, pintura inpresionistaren argazki-asmoarekin kontrajarrita. Horretarako, irudi japoniarrak bezalako lanak izan zituzten inspirazio iturri.
Kolore-lauez gain, lan honek ezohizko perspektibaren erabilera, bolumen eskasa, ingerada beltzak eta enkoadraketa asimetrikoa partekatzen ditu grabatu japoniarrekin.
Pierre Bonnardek berrikuntza horiek guztiak aplikatu zizkion litografiari. Izan ere, eskakizun teknikoei zegokienez, litografia bitarteko egokia zen esperimentatzeko, kolorearen erabileragatik eta merkeagoa izateagatik. Bonnardi gainera, zirkuitu artistiko murriztua gainditu eta pertsona kopuru handiago batengana iristeko teknika horrek zuen gaitasuna interesatzen zitzaion. Pintore eta grabatzaile hau Les nabis izeneko taldearen sortzaileetako bat izan zen. Nabis izenak jatorri hebrearra du, eta literalki "profetak" esan nahi du. Nabien helburuetako bat artearen mugak hedatzea zen hain zuzen ere: elite artistikoa gainditu nahi zuten, aplikatutako arteen bidez sormenak eguneroko bizitza har zezan.
Horregatik, landu zituen estanpak Bonnardek buru-belarri, baita kartelak edo antzerkiko eszenografien diseinuak ere. Kartelgile gisa publikoaren gorespena jaso zuen 1891n , xanpain marka bat merkaturatzeko diseinatu zuen kartel batek sari bat jaso zuenean. Bost urte beranduago, Ambroise Vollard galeristak bere galeria berria iragartzeko kartela egiteko enkargua egin zion, estanpen erakusketa batekin batera. Horien artean zegoen hemen ikusgai dugun Ikuzle txikia.