Paris: arteen hiriburua, 1900-1968
Espiritualtasuna eta materia
Atalak
Paris: arteen hiriburua, 1900-1968
- Izenburua:
- Paris: arteen hiriburua, 1900-1968
- Erakusketa:
- Paris: arteen hiriburua, 1900-1968
- Gaiak:
- Sorkuntza artistikoa | Bigarren Mundu Gerra | Lehen Mundu Gerra | 68ko maiatza | Paris | Auzo Latinoa | Montmartre | Montparnasse | Saint-Germain-des-Prés
- Mugimendu artistikoak:
- Kubismoa
- Aipatutako artistak:
- Braque, Georges | Chagall, Marc | Kelly, Ellsworth | Mondrian, Piet | Picasso, Pablo
XIX. mendearen urte gehienetan eta ia XX. mende osoan, Paris arteen hiriburua izan zen inolako zalantzarik gabe. Paris: arteen hiriburua, 1900–1968 erakusketan ibilbide bat egingo dugu XX. mendearen lehenengo zazpi hamarkadetan zehar pinturan eta eskulturan Parisen izan ziren aurrerapen nabarmenenak ezagutzeko. Hiriaren edertasunak, bertako giro erromantikoak, bere historia kulturalak, politika liberalak eta bizi-kostu merkeak munduko bazter guztietako artistak erakarri zituzten, esate baterako Picasso espainola, Marc Chagall errusiarra, Piet Mondrian holandarra eta Ellsworth Kelly amerikarra, erakusketa honetan jasotzen diren artista batzuk aipatzearren.
Aldi hartako jarduera artistiko handia Parisko lau gunetan bildu zen: Montmartre, Montparnasse, Saint-Germain-des-Prés eta Auzo Latinoa. Montmartre kubismoaren sorburua izan zen, Picassok eta Braque-k bidea egin zioten mugimenduarena. Jazzaren garaian, hogeiko eta hogeita hamarreko hamarkadetan alegia, Montparnasse artista bohemioak elkartzen zireneko giro handiko lekua zen. Gerra garaiko Parisko giro goibelean, arte berri bat sortu zen Saint-Germain-des-Présen. Berrogeita hamarreko hamarkadako berpizte aldiaren ondoren, arteak eta artistek Parisko Auzo Latinoko kaleak hartu zituzten 68ko Maiatzaren matxinadan.
Hemen erakusgai jarri diren obra gehienak Parisen sortu ziren eta erakusketa honen bidez hiri handi honen izaera eta dinamismoa erakutsi nahi da. I. Mundu Gerraren aurretik Vienako eta Berlingo hiriek edo berrogeita hamarreko eta hirurogeiko hamarkadetan New Yorkeko hiriak Parisi desafio egin arren, artistek ideiak trukatzen eta bidaiatzen jarraitu zuten inspirazio-iturri agortezina izan zen hiri honetako erromantizismoak eta bizitasun intelektualak bultzatuta.