Migel Anjel eta bere garaia

Iruzkinak

Fra Bartolomeo, [Aingerua eskuinalderantz hegaka, 1505-1507]

Aingeru dinamiko hau Fra Bartolomeo-ren aurreneko obra handirako estudio bat izan zen: San Bernardori Ama Birjina agertu zitzaion unea. Florentziako familia batek eskatu zion bere kaperarako. Gaur egun, pintura Florentziako Uffizi Galerian dago ikusgai.

Itxuraz, XVI. mendean estudio hau Santa Katalina irudikatzen duen beste batekin konbinatu zuten, eta erakusketa honetan ikusi ahal izango duzu baita ere. Lerro batez banatuta, bi irudiek Deikunde bat eratzen zuten baina, jakina, hori ez zen Fra Bartolomeok hasieran zuen asmoa. 1895ean, Albertinako marrazkien inbentarioa egin zutenean, bi laminak berriro banatu zituzten. Hala ere, erdian, inskripzio zaharra ikus daiteke oraindik behealdeko ertzean.

Litekeena da marrazki hau lehen Giorgio Vasari-ren bildumakoa izatea eta baliteke bera izatea bi marrazkiak elkartu zituena. Izan ere, bere Libro dei disegnin edo “marrazkien liburuan” Fra Bartolomeoren marrazki ugari erantsi zituela onartu zuen Vasarik.

Fra Bartolomeok klariona beltza erabili du marrazki hau egiteko. Aingeruaren jantzia, lepoa eta hegoak nabarmentzeko zuria erabiltzen du. Itzaleztatutako aldeetan trazuak lausotu egiten dira eta horrela irudiak laino edo sfumato antzeko batean bilduta dagoela ematen du. Pinturan, tonuak bata bestearen gainean apurka-apurka nahastuz trazu fuerteak arintzeko teknika da; eta horrela mugimenduzko sentsazio sotila lortzen da. Hemen, oihalak eratutako zurrunbilo batean zehaztu gabe agertzen dira jantzien ertzak, aingerua laino baten gainean ezarri berri delako sentsazioa areagotuz.