Barroko neurrigabea. Cattelan-etik Zurbarán-era
Pieter Aertsen, Haragi postua, 1551–55
Iruzkinak
Sarrera
- Izenburua:
- Sarrera
- Erakusketa:
- Barroko neurrigabea. Cattelan-etik Zurbarán-era
- Gaiak:
- Gizakia | Generoa eta sexualitatea | Artea eta historia | Eragin artistikoa | Argia | Kolorea | Konposizioa | Sinbologia | Sinbolismo erijiosoa | Morala | Satira | Neurrigabekeria | Emozioa | Grina | Lizunkeria | Satira
- Mugimendu artistikoak:
- Arte Garaikidea | Barrokoa
- Artelan motak:
- Pintura
- Aipatutako artistak:
- Aertsen, Pieter | Cattelan, Maurizio | Crumb, Robert | Ribera, José de
Barroko neurrigabea erakusketak uztartu egiten ditu XVII. mendeko lanak eta egungo artelanak: besteak beste, Pieter Aertsen-en, José de Ribera-ren, Maurizio Cattelan-en eta Robert Crumb-en lanak daude. Bizitasuna da erakusketaren ardatza. Erakusgai diren gaur egungo artelanek halako dardara eta zirrara sortzen dute, Barroko garaiko artea beste modu batean ikus dezagun eta eztabaida sor dadin. Erakusketa honen helburua da Barrokoa haren ohiko noziotik askatzea, estiloaren historian duen testuingurutik ateratzea eta hari lotutako arte-estereotipoetatik urruntzea. Erakusketak, beraz, ez du zerikusirik handitasunarekin, apaingarriekin edo urrearekin. Aitzitik, gai ditu bizitasun ezegonkorraren adierazpideak, hau da, bizitzaren alde ezegonkor eta iragankorrak aditzera ematen dituzten arte-adierazpide oparoak. Artelan batzuetatik besteetara hainbat mendetako aldea badago ere, denek islatzen dituzte alde horiek: giza kondizioaren ezaugarri bereizgarri horren berri ematen digute. Zinemako baliabideen antzekoak erabili dituzte bi garaiko artelanak ondoan jartzeko. Errealitate desberdinak dira, baina elkarren artean zerikusia dutenak. Erakusketan talka egiten dute, eta elkar aberastu. Topaketaren ondorioz, biziberritu egiten dira, eta narrazio-ildoa, narrazioaren norabidea, eten.
Erakusketa Suitzan izan zen aurretik. Bertan Deftig Barock izenburua eman zitzaion. Alemanez, deftig hitzak zakarra, gordina, baldarra edota lizuna esan nahi du. Hitz hori ezin hobe egokitzen zaio Barrokoari; izan ere, garai horretako arteak bizitzaz gainezka egitear dago. Deftig kontzeptua hainbat alditan aurkituko duzu erakusketan zehar.
Didaktika gune bat du erakusketak. Bertan, erakusketa osatzeko, hautatutako musika entzuteko aukera duzu. Era berean, erakusketarekin zerikusia duten hainbat terminoren definizioak daude; gainera, terminoak elkarrekin lotzeko jolasa dago. Termino horien artean ditugu bizitasuna, emozioak, neurrigabetasuna, hondamendia, antzerki-izaera eta sentsualtasuna.
Erakusketa elkarrekin antolatu dute Kunsthaus Zürich-ek eta Guggenheim Bilbao Museoak.