Barroko neurrigabea. Cattelan-etik Zurbarán-era
Francisco de Zurbarán, Herkules bidea ixten Alfeo ibaiari, 1634. Christian van Couwenbergh, Genero eszena “Beltzaren bortxaketa” izenez ezaguna, 1632
Bartolomeo Passerotti, Maitale eroak, d. g.
Iruzkinak
Glenn Brown, Munduko baztertua (Nigger of the World), 2011
- Izenburua:
- Glenn Brown, Munduko baztertua (Nigger of the World), 2011
- Erakusketa:
- Barroko neurrigabea. Cattelan-etik Zurbarán-era
- Gaiak:
- Emakumea artean | Giza gorputza | Artea eta emozioa | Eragin artistikoa | Kolorea | Konposizioa | Biluzia | Bakardadea | Beldurra
- Mugimendu artistikoak:
- Neoespresionismoa
- Teknikak:
- Olio-pintura
- Artelan motak:
- Pintura
- Aipatutako artistak:
- Brown, Glenn
Glenn Brown artista britainiarrak margolan honen izenburua kanta batetik hartu zuen, Yoko Ono-ren eta John Lennon-en batetik, hain zuzen. Irudia Rembrandt-en Susana eta zaharrak artelanean dago oinarritua. Rembrandten margolanean Susana ikuslearengana biratu eta hari begira geratzen zaio. Hemen, aldiz, bere aurpegia estaltzen du. Atentzioa ematen digu gorputzaren kolore artegagarria: berde eta hori distiratsua, haragi bizian dauden zauri antiestetikoak. Koloreak aukeratzeko Mathias Grünewald Errenazimentuko margolari alemanak XVI. mendean egindako erretaula batetik edan zuen.
Brownek emakumea atze-oihal urdin ilun baten aurrean jarri du, margolanaren giro arraroa, beste mundukoa, nabarmentzeko. Ia argazki bat ematen du; hori lortu du pintzelkada mehe eta lauei esker, oso pintzel finak erabilita. Margotzeko metodo tradizionala erabiltzen du, ohol gaineko olio-pintura. Brownen margolanek atzera egiten dute artearen historian zehar, Errenazimentutik XX. mendera arte. Bai bere artelanak bai bere gaiak betierekoak dira. Aurreko artelanetatik gauzak maileguan hartu eta bereganatzen ditu, kopiatu gabe baina. Brownek ez du jatorrizko margolanik erabiltzen, baina horren ordez posta-txarteletan inprimatutako irudietara jotzen du; baita sarean edo liburuetan aurkitzen dituen horietara ere. Interesatu egiten zaio inprimatzeko eta erreproduzitzeko orduan irudi bat nola aldatzen den ikustea. Jatorrizko margolanak testura galtzen du; koloreak desitxuratu egiten dira. Artistak desitxuratze horiek handitu egiten ditu. Kolore naturalistak bizi-bizi bihurtzen dira; eta figurak handitu edo luzatu egiten dira. Brown bere lanaz honela mintzatu da:
Joera dut margotzen ditudan pertsonak itsu bilakatzeko. Haiek itsu bilakatuz gero, edo haien begirada ezkutatuz gero, ikuslea behartuta dago koadroko beste gauzei erreparatzera.
Badirudi ez dagoela loturarik margolan honen izenburuaren eta edukiaren artean. Hori ohikoa da Brownen lanetan. Izenburu gehienak pop kulturatik hartzen ditu, eta bere margolanetan txertatzen dituenean, nahasgarri bihurtzen dira; misterio-kutsua handitzen dute.