Frank Gehry, arkitektoa

Iruzkinak

Loyola University Law School, Los Angeles, Kalifornia, 1978

1978an Frank Gehry-k bere proiektu handienetako bat izango zenari ekin zion: Los Angeleseko Loyola Unibertsitatearen Zuzenbide-Fakultatea. Obra berak egitea lortzeko arkitekto "zuhur" gisa sustatu zuen bere burua, aurrekontu xume batetik kalitatezko lana eskaintzeko gai zena. Horrek fakultateko batzorde aurrezlean ez ezik diseinuan ere eragin zuela esan izan da.

Nolanahi ere, Gehryrentzat proiektu hura oso erakargarria zen, Torontotik iritsi zenean nerabezaroa bizi izan zuen auzoan bertan eraikiko zelako. Unibertsitatea nahiko jendetsua den hiriko zona batean dago eta, beraz, bezeroen nahiari jarraituz fakultateak segurtasuna eta nolabaiteko isolamendua eskainiko zuen lekua izan behar zuen, leku atsegina izateari utzi gabe, ordea. Gehryk eman zien irtenbidea hauxe izan zen, hiri unibertsitario antzeko bat sortzea, forma eskultorikoak izango zituzten eraikin desberdinetan banatua, paisaian bereizitako objektua balira bezala, urmael batean uraren gainean dauden ontziek eskaintzen duten ikuspegi antzeko bat.

Gehryrentzat arkitekturak pertsonak harreman sozialak izatera gonbidatuko lituzkeen lekua izan behar zuen. Burns Student Center eraikin laukizuzenaren fatxadan eskailerak ipintzean foro sozial bat sortu zuen, eskailera horiek barrualdean ezkutatuz gero existituko ez litzatekeena. Ikasleak igo edo jaisten direnean, edo patioa zeharkatzen dutenean, etengabe aldatzen ari diren diseinuaren osagai bihurtzen dira ametsetako paisaia baten barruan, hau da, eskala erreala duten maketa arkitektonikoez betetako eszenatoki surrealista bat osatuz.

Era berean, patioko zutabe exentuen ilarak, edozein kasutan, unibertsitateko campus batean gaudela gogorarazten digu, erudizioari eskainitako leku batean, alegia. Eraikinez osatutako akropoli bat da, modu berri eta dibertigarri batean bere zeregina betetzen duena.

Frank Gehry:

Hainbeste denbora behar da eraikin bat eraikitzeko. Bukatu duzunerako sarritan beste gauza batzuetan ari zara dagoeneko eta guztia beste modu batez egin nahi zenuke.

Kontzientzia alatzen zaizu bezeroari maula egin bazenio bezalaxe sentitzen zarelako. Behin obra bukatu ondoren, hobe zitekeen zerbait topatzen duzu eta nolabait ere errudun sentitzen zara aurretik bururatu ez zaizulako. Ez dakit zer izango ote den. Oso sentsazio arraroa da. Bi edo hiru urte pasa ohi dira sosegatzen eta emaitzaz gozatzen hasi aurretik.

1978az geroztik, Loyola University Law Schooleko jatorrizko proiektuak aldaketa eta zabalkuntza bat baino gehiago izan ditu. Izan ere, eranskin berriak eraikitzen ari dira oraindik ere, Frank Gehryk berak diseinatuak.