Anselm Kiefer

Iruzkinak

Obra-sortari buruzko azalpena: Paul Celan seriea

Paisaia erraldoi hauetan uzta ereindako soroak agertzen dira, lokatzez eta elurrez estaliak. Ikuspegi dramatiko honetan, uztondoaren errenkadak, erreak eta belztuak, abiadan pasatzen dira koadroetatik. Kiefer-ek Austrian, Salzburgo inguruko landan egindako argazki batzuetan daude oinarrituak.

Begiratu koadroak gertuagotik. Adar-sorta handiari dirudienez apurtu zaizkion adaska batzuek antzinako zeinu germaniarren forma dute, errunen forma, hain zuzen ere. Jatorriz tribu germaniarrek erabiltzen zituzten errunak, eta zeinu horietako batzuk sinbolo gisa bereganatu zituen geroago Alderdi Naziak. Dena den, Kieferrek Paul Celan-en olerki baten ahapaldi bat aipatzeko erabili ditu hemen, alemanez SeptemberKrone izeneko olerkiarena.

Koadroen gainazalek lurraren testura bera dute. Olio-pinturaz gain, igeltsua, egur-ikatza, eta hainbat material eta objektu nahaspilatuak erabili ditu hemen: zuhaitz-adarrak, metalezko aulki tolesgarriak eta giza ilea.

Hemen agertzen diren lan guztiak Paul Celan poeta judu-errumaniarraren obran inspiratuak daude. Bere poema ezagunenetako batzuk Bigarren Mundu Gerran idatzi zituen, nazien kontzentrazio-esparru batean. Kieferren koadroek Celanen olerki ezagunenari erreferentzia egiten diote – Heriotzaren ihesa – zerua goibel ikusten den paisaia hotz eta gordin batean. Olerkian, ‘Heriotza’ aleman gaizto bat da, begi urdinduna. Pertsona-talde anonimo bati “goiztiriko esne beltza” eskaini die edateko, eta begira ari zaie beren “hilobia zeruan” egiten ari diren bitartean. “Lurrean sakonago zulatzeko” garrasi egin, eta mehatxu hau bota die: “kea bezalaxe igoko zarete zerura”.

Koadro hauei buruz hizketan, Kieferrek lurra eta sua aipatu ditu, eta Kabalak eragiten dion jakin-mina: “Goldatzea eta erretzea” dio “birsortze-prozesua da, lurra berritu ahal izateko eta berriro emango duen uzta eguzkira begira hazteko…”.