© Murakami
Mr. DOB PO+KU Surrealismoa (urdina), (berdea) eta (arrosa) [PO+KU Surrealism Mr DOB (Blue), (Green) and (Pink)], 1999
727-727, 2006
Iruzkinak
Inochi, 2004
- Izenburua:
- Inochi, 2004
- Erakusketa:
- © Murakami
- Gaiak:
- Artea eta gizartea | Eragin artistikoa | Sorkuntza artistikoa | Erretratua eta autorretratua | Japonia
- Mugimendu artistikoak:
- Arte Figuratiboa
- Artelan motak:
- Eskultura | Ikus-entzunezkoa
- Aipatutako artistak:
- Murakami, Takashi
Irudi hau, Inochi izenekoa, 2004ko eskultura bat da. Gerra ostean, robotek Japonia liluratu zuten eta ondorioz, jostailu, pelikula eta marrazki bizidun askotan agertzen ziren; lilura hori, hain zuzen, izan da eskultura hau sortzeko oinarria. Hala, pertsonaia berezia da Inochi: mutil nerabe gazte baten eta robot baten nahasketa, alegia. Haren buru obalatu handiak Stephen Spielberg-en E.T. pertsonaia gogora ekartzen digu; eta besoak zabalik eta ahurrak agerian dituela, Kristo antzeko posea du. Inochi barregarria da, baina fintasun handikoa: Murakami-k arreta oso handiarekin landutako irudietako bat da, eta Japoniako eskultura figuratibo tradizionalean oinarritua dago. Lanaren eskala intimista eta dotoretasun nabariak ikuslearekin harremanetan jartzen du, gainera.
Artistak Inochiren lau aldaera ekoiztu zituen kolorazio desberdinekin; eskolako uniformeak daramatzate, bataren eta bestearen artean aldaketa batzuk daudela. Murakamirentzat, autorretratu bat da lan hau: aldaera bakoitzak hartutako kultur-identitate bat adierazten du. Gainera, telebistako iragarki labur batzuk sortu zituen pertsonaia honen inguruko fikziozko kontakizun batean oinarrituak. Bertan, Inochik, institutuko mutil batek, ikaskide duen neska batekin elkarraldi bat du eta hala jabetuko da haren sexualitateaz. Film hauek erakusketan ikus ditzakezue.
Murakamik azaldu duenez, irudi hau sortzeko Steven Spielbergek zuzendu zuen Stanley Kubrick-en A.I. zinema-proiektuan inspiratu zen. Film horrek Brian Aldiss zientzia-fizkiozko idazle famatuaren Supertoys Last All Summer Long (1969) kontakizun laburra oinarri du: robot adimentsu baten istorioa azaltzen da bertan, oso itsusia izateagatik lehen begiratuan ikara eragiten duen robota, baina kontakizunak aurrera egin ahala maitagarri bihurtzen dena.