© Murakami
Inochi, 2004
Taximetroa (Dumb Compass), 2008 eta Amaigabetasuna (Infinity), 2008
Iruzkinak
727-727, 2006
- Izenburua:
- 727-727, 2006
- Erakusketa:
- © Murakami
- Gaiak:
- Artea eta ekonomia | Artearen demokratizazioa | Eragin artistikoa | Sorkuntza artistikoa | Lan-prozesua | Japonia | Tradizioa
- Mugimendu artistikoak:
- Pop Artea
- Artelan motak:
- Pintura
- Aipatutako artistak:
- Murakami, Takashi
727-727 obra 2006koa da. 1990eko hamarkada amaieran Murakami-k hasitako pintura-sail garrantzitsuenetako bati dagokion lana da. Honekin lotutako 1996ko obra bat, 727 izenekoa, ikusgai dago erakusketan.
Titulua aukeratzeko garaian Japoniako 727 kosmetikoen enpresan inspiratu zen. Izena deigarria iruditu zitzaion artistari, AEBetako industria aeronautikoarekin duen asoziazioa kontuan izanik.
Pintura hiru paneletan zehar hedatzen da. Erdian, Murakamiren pertsonaia bereizgarria, Mr DOB, uhin estilizatu baten gainean mugitzen da —agian uhinak arrastaka darama—. Hemen, DOBen irudiaren bertsio izugarria aurkezten zaigu: zital, grotesko eta bortitz, irri antzekoan hortz zorrotzak erakutsiz.
Pinturaren ezohiko gainazala honela eratu zuen artistak: patina joria sortzeko pintura-geruzak bata bestearen gainean, banan-banan, aplikatu eta ondoren lixatu zituen. Hala, Murakamik agerian uzten du zein prozesu nekeza eramateko prest dagoen haren artelanak sortzeko. Gainera, nihonga edo “japoniar estiloko” pinturaren teknikak ere gogora ekar ditzakete lanok, Murakamik Tokioko unibertsitatean ikasitakoak.
Mihiseen hondoa urarekin orbandu izan balitz bezala agertzen da eta beste erreferentzia artistiko bat aditzera ematen digu: Andy Warhol pop artista estatubatuarraren Oxidazio-pinturak. Murakami sarritan konparatu izan dute Warholekin. Warholek bezala, berak ere lausotzen ditu arte jasoaren eta kultura herrikoiaren arteko mugak, eta hark bezala, aztertu egiten du artearen eta masa-produkzio komertzialaren arteko erlazioa.