Rubens eta bere garaia. Ermitage Museoaren altxorrak
Jan Fyt, Azeri-ehiza
Peter Paul Rubens, Lurraren eta Uraren batasuna
Iruzkinak
Peter Paul Rubens, Irudi klasikoa (Seneka)
- Izenburua:
- Peter Paul Rubens, Irudi klasikoa (Seneka)
- Erakusketa:
- Rubens eta bere garaia. Ermitage Museoaren altxorrak
- Gaiak:
- Arte klasikoa | Artea eta filosofia | Artea eta historia | Artearen historia | Ibilbide artistikoa | Sorkuntza artistikoa | Italia | Seneka
- Mugimendu artistikoak:
- Barrokoa
- Teknikak:
- Marrazkia
- Artelan motak:
- Eskultura | Pintura
- Aipatutako artistak:
- Rubens, Peter Paul
Rubens-ek 1600 eta 1605 bitartean egindako marrazki honek, antzinako estatua klasiko bat erakusten digu. Estatua hori Louvreko museoan dago orain, eta Afrikar arrantzalea izenarekin da ezaguna. Hamaseigarren mendearen bigarren erdian Erroman egindako arkeologia-indusketetan aurkitu zuten, eta Rubensek Italian zegoela —1600 eta 1608 bitartean— ikusi zuen.
Garai hartan, uste izan zuten estatuak Senekaren, Erromako filosofo handiaren, heriotza irudiztatzen zuela. Tazito historialariaren arabera, Senekak bere buruaz beste egin zuen, ur beroko bainu batean oinetako zainak ebakita; horrela, Neron enperadoreak bera hiltzera bidalitako hiltzaileei aurrea hartu nahi zien. Beharbada, estatuaren zain handituek eragingo zuten identifikazio hori; bai eta hanken zati bat, belaunetik beherakoa, galduta izateak ere. Bazirudien irudia bainuontzian zutik egongo zela, apika. Izan ere, aurkitu eta lasterrera, eskultura “zaharberritu” egin zuten, eta irudia marmolezko bainuontzi baten forma zuen idulki baten gainean ezarri. Bainuontzi haren gainaldea gorriz tindatua zegoen, odola irudikatzeko. Geroago, idulki hura kendu egin zuten; baina haren zati bat ikus dezakezu Rubensen marrazkian, klera gorrizko trazu batzuez koloreztatua.
Rubensek garai hartan indusketetatik ateratako beste eskultura helenistiko batzuen kopiak egin zituen, hala nola Laokoon. Baina zirrara berezia eragin zion Senekaren estatua batek. Rubens zirkulu intelektualetan ibiltzen zen, eta zirkulu haietan biziro miresten zuten Senekaren filosofia estoikoa. Estatua horren sei marrazki zaindu egin zituen, gutxienez, estatua ikuspuntu ezberdinetatik hartuta; bai eta orain Municheko Altes Pinakothek museoan dagoen pintura bukatu bat ere.