Rubens eta bere garaia. Ermitage Museoaren altxorrak
Jacob Jordaens, Kleopatraren oturuntza
Marx Weinold, Erretilu apaingarria: ikaskuntzaren alegoria
Iruzkinak
Sebastiaen Bonnecroy, Natura hila garezurrarekin
- Izenburua:
- Sebastiaen Bonnecroy, Natura hila garezurrarekin
- Erakusketa:
- Rubens eta bere garaia. Ermitage Museoaren altxorrak
- Gaiak:
- Heriotza | Sorkuntza artistikoa | Denbora | Sinbologia | Natura hila | Vanitas
- Mugimendu artistikoak:
- Barrokoa
- Teknikak:
- Trompe l’œil
- Artelan motak:
- Pintura
- Aipatutako artistak:
- Bonnecroy, Sebastiaen
Sebastiaen Bonnecroy-k 1668an margotu zuen Natura hila garezurrarekin. Konposizio honek bi natura hil ezberdin elkartzen ditu: trompe l’œil eta vanitas direlakoak, alegia.
Frantseseko trompe l’œil terminoak, hitzez hitz, ‘begia engainatu’ esan nahi du. Eta errealitate-ilusio indartsua sortzen du trompe l’œil teknika darabilen natura hilaren margolanak. Hemen, artistak bere estudioko objektuak ikusten ari garela sinestarazten digu ia: erdialdean, orratzez zurezko bastidoreari lotutako mihise margotuak; ezkerrean, iltze batetik zintzilik dagoen paleta bat; haren gainean, armadura jantzita duen gizon baten erretratua. Horiek guztiak, zurezko panelen itxura izateko eran margotutako atzealdearekin ageri dira. Konposizioaren behealdean, eskuinean, margolariek pintatzeko eskuari eusteko erabiltzen duten makila dago, zeharka jarrita. Makilaren goiko muturretik gertu, berriz, berniz botila bat dago, iltze batetik zintzilik. Eta, azpian, pintatzeko brotxak dituen metalezko ontzia, eta laban bat.
Baina konposizioaren gunerik garrantzitsuena, betiere, mihise gaineko margolana da. Vanitas tradizioari darraion natura hila da. Vanitas delakoa, lurreko bizitzaren izaera laburra eta lurreko plazerren banitatea irudikatzen dituen pintura da. Bibliatik datorren ideia da: vanitas vanitatum, omnia vanitas (‘banitateen banitatea: dena da banitate’). Artistak sinboloak darabiltza bere ikuspegia azaltzeko. Garezurrak heriotzaren hurbiltasuna adierazten du, argi eta garbi. Ezkerreko xaboi burbuilak, aldiz, bizitzaren hauskortasuna adierazten digu. Garezurraren atzealdean dagoen hareazko erlojuak denbora pixkanaka‑pixkanaka joan egiten zaigula iradokitzen du. Baina bada esperantzarako elementu bat ere. Huntz-koroa du gainean garezurrak. Huntzak ez du urte osoan hostoa galtzen; hortaz, hurrengo munduan betiko bizitzara berpiztuko garela iradokitzen du.