Rubens eta bere garaia. Ermitage Museoaren altxorrak
Jacob Jordaens, Agure baten erretratua
Iruzkinak
Itsasontzi formako zintzilikarioa
- Izenburua:
- Itsasontzi formako zintzilikarioa
- Erakusketa:
- Rubens eta bere garaia. Ermitage Museoaren altxorrak
- Gaiak:
- Artea eta historia | Bildumagintza | Sorkuntza artistikoa | Materiala | Sinbologia | Ermitage Museoa | Espainia | Itsasontziak
- Mugimendu artistikoak:
- Barrokoa
- Artelan motak:
- Artisautza | Bitxiak
Itsasontzi forma duen zintzilikario txundigarri hau Ermitageko bildumako bitxi finenetarikoa dela jotzen da. Itsasontziaren gorputz nagusia, kolore berde sakoneko kolonbiar esmeralda handi bat da. Gainean, zintzilikarioaren itxigailua den gurutzea dago, beste bost esmeraldez egina. Itsasontziaren masta ere beste esmeralda bat da; eta soketako xehetasunak, berriz, finki grabatutako urrezkoak dira. Esmalte zuria erabili da itsasontziaren karela eta belak egiteko. Itsasontziaren beheko ertzetik zintzilik, perlak izango ziren garai batean; edo, beharbada, esmeralda gehiago.
Zintzilikarioa Espainian egin zuten, 1580ko 1590eko hamarkaden bitartean. Hamaseigarren eta hamazazpigarren mendeetan, itsasontziaren motiboa gero eta areago zabaldu zen. Esplorazio geografikoari eta lur berrien aurkikuntzari lotuta zihoan. Bitxiak ez ezik, kopak eta kalizak ere itsasontzi formarekin egin zituzten. Espainia bereziki harro zegoen itsasoan egin zituen balentria handiez eta garaipen ugariez. Eta honelako zintzilikarioak garaipen haiek ospatzeko ziren, hain zuzen ere. Ematen du oroitzapeneko opari gisa, talisman gisa edo kutun gisa diseinatu zituztela; edo apaintzeko ere eramango zituzten, bai gizonek bai emakumeek.