Rubens eta bere garaia. Ermitage Museoaren altxorrak
Peter Paul Rubens, Irudi klasikoa (Seneka)
Jacob Jordaens, Kleopatraren oturuntza
Iruzkinak
Peter Paul Rubens, Lurraren eta Uraren batasuna
- Izenburua:
- Peter Paul Rubens, Lurraren eta Uraren batasuna
- Erakusketa:
- Rubens eta bere garaia. Ermitage Museoaren altxorrak
- Gaiak:
- Pertsonaia mitologikoak | Artea eta historia | Artea eta politika | Sorkuntza artistikoa | Sinbologia | Merkataritza | Oparotasuna | 80 urteko gerra | Hamabi urteko Tregoa | Anberes | Escalda ibaia | Herbehereak | Flandes
- Mugimendu artistikoak:
- Barrokoa
- Artelan motak:
- Pintura
- Aipatutako artistak:
- Rubens, Peter Paul
Rubens-en margolan monumental hau, Lurraren eta uraren batasuna, 1618 ingurukoa da. Lurra irudikatzen duen emakumezko irudi bat erakusten digu, Ura irudikatzen duen gizonezko irudi bati eskutik helduta. Naturako elementuak giza itxurarekin irudiztatzea oso zabaldua zegoen aldi hartako flandestar artisten artean. Baina Rubensek esanahi topikoagoa eman dio pinturari. Uraren irudia, Anberesen zeharkatzen duen Escalda ibaiarekin identifika daiteke; eta lurraren irudia Anberesko jainkosatzat har genezake. Margolana, horrela ikusita, Anberesek portu gisa zuen aintzaren erreferentzia zen, Anberesen oparotasunaren eta hango ibaiaren arteko lotura nabarmenduta. Horrek garrantzi berezia du hamazazpigarren mendeko hasierako hamarkadetan. Urtetan liskarrean aritu eta gero, su-etena sinatu zuten 1609an, hegoaldeko flandestar katolikoen eta iparraldeko herbeheretar probintzia protestanteen arteko gerra zibila amaiarazteko. Su-etenak esperantza eragin zuen, herbeheretarrek Escalda ibaia blokeatzeari utziko ziotela, eta hartara merkataritzari berriz ekin eta oparotasuna itzuliko zela Anberesera.
Interpretazio hori aldezten duten sinboloez beterik dago margolana. Ura darion ontziak ibaia sinbolizatzen du. Jainkosaren kornukopia, fruituez gainezka, Ama Lur jainkosaren sinbolo tradizional bat da; baina hiriaren ondasuna eta oparotasuna ere iradokitzen du. Arrano-hegoak dituen emakumezko irudi bat, Lurra mirto girlanda batez ari da koroatzen, eta hori ere bakearen eta zoriontasunaren sinbolo dugu. Jainkoa eta jainkosa, gainera, eskuak adostasuna erakutsiz dituzte elkartuta, eta ibaiko jainkoaren laguntzaileetariko bat itsas kurkuilu bati putz egiten ari zaio, olatuak baretzeko. Aro berri baketsu horretan, tigre basatia ere etxekotu egin da.
Hala, bada, Rubensek tradizio klasikoaren sinboloak hartu ditu, eta eman nahi zuen mezurako egokitu. Rubens bera diplomatiko nabarmena zen, Espainiako koroaren zerbitzura. Bere garaiko politikako gorabeherak adierazten dituen lan bat egin du, bera politika horretan jokalari garrantzitsua izanik.