Rubens eta bere garaia. Ermitage Museoaren altxorrak
Anton van Dyck, Kristo bere dizipuluei agertu zitzaienekoa
Jan Brueghel Zaharra, Paisaia oihantsua (atsedenaldia Egiptorako ihesaldian)
Iruzkinak
Wilhelm Schubert von Ehrenberg, Eliza baten barrualdea
- Izenburua:
- Wilhelm Schubert von Ehrenberg, Eliza baten barrualdea
- Erakusketa:
- Rubens eta bere garaia. Ermitage Museoaren altxorrak
- Gaiak:
- Arkitektura | Artea eta erlijioa | Artea eta historia | Eragin artistikoa | Sorkuntza artistikoa | Katolizismoa | Anberes | Anberesko Jesuiten Eliza | Anberesko katedrala | Flandes | Italia
- Mugimendu artistikoak:
- Barrokoa
- Artelan motak:
- Pintura
- Aipatutako artistak:
- Neefs Gaztea, Peter | van Ehrenberg, Wilhelm Schubert
Italiako eliza baten barrualdea erakusten duen margolan hau Wilhelm Schubert von Ehrenberg‑ek egin zuen, 1665ean. Von Ehrenbergek Italiako elizen hainbat pintura egin zuen, nahiz eta Italian sekula ere izan ez zen. Bere lana italiar grabatuetan oinarritu zuen, haietatik arkitektura-elementu indibidualak hartuta. Dena dela, bere diseinu irudimentsuetara aldatzen zituen beti. Honako honetan, badirudi Erromako San Pedro basilikako arkitektura egituratik eta dekoraziotik hainbat elementu hartu dituela; bereziki, atzealderantz bistatik galduz doazen arkuei eusten dieten zutabe sendoak, eta erdian ageri den errotonda.
Eliza-barrualdeen multzo honetan ikusi ahal izango dituzun beste margolan batzuk Flandesko bertako eraikinak dituzte oinarri. Adibidez, Peter Neefs Gaztearen bi pintura aurkituko dituzu: Anberesko San Karlos Borromeoren eliza, eta Anberesko katedralaren barnealdea. Katedrala, Flandesko eliza gotikorik handiena zen, eta Neefsen margolanak zehaztasunez jasotzen du haren handitasun bihotz‑goratzailea. Neefsek, orobat, erdialdeko pilare handien kontra altxatutako aldare txiki ugariak nabarmendu zituen. Gure begia batetik hurrengora eramaten digu, harik eta, azkenean, korua eta nabea bereizten dituen manpara apainduak urrutiko aldare altua ezkutatzen digun arte.
Hamazazpigarren mendearen hasierako hamarkadetan, sekulako goraldia izan zuen elizen eraikuntzak Anberesko hiri katolikoan. Gainera, hainbat eliza eta monasteriotan, berritu beharrean ziren aurreko mendean erlijio- eta politika-arloko liskarrek suntsitutako dekorazioak. Ondorio gisa, toki publiko horietarako lan berriak egiteko eskari handia zegoen. Flandestar artistek erronkari eutsi zioten, eta erlijioko irudiak izan ziren, alde handiarekin, Anberesko arte-produkzioaren zatirik handiena.