Lee Krasner. Kolore Bizia

Iruzkinak

Borroka [Combat], 1965

1965ean egin zuen Krasnerrek lehenengo erakusketa erakunde publiko batean, Londresko Whitechapel Gallery-n, hain zuzen ere. Bryan Robertson izan zen erakusketa haren komisarioa, eta aurretik Pollock, Rothko eta Kline aritu izanak ospea ematen zioten erakusketari. Bestalde, gogotsuak izan ziren kritikak. Litekeena da horregatik margotzea Krasnerrek garai hartan horrenbesteko kemenaz.

Borroka laneko koloreak oso biziak dira, horrenbeste ezen minak izatera ere iristen diren. Krasnerrek alizarina-gorriaren eta krema zuriaren zaletasuna erakusten jarraitu zuen, kadmio laranja ezin biziagoaren aurrez aurre. Beharbada borroka (kromatiko) hori izan zen izenburua inspiratu zuena, zeina estudiora bisitan joandako hamar urteko mutiko batek jarri baitzion. Krasner bere kurba zabaletara eta lerrozuzen sarkorretara itzuli zen, baina, oraingoan, kontrapuntu gisa erabilita. Behetik, ezkerraldetik, irteten den diagonalari jarraitzen badiogu, itxuraz triangelu baten ezkerreko aldea osatzen ari dela hauteman dezakegu, eta haren eskuineko aldea hondoratu egiten dela, gainera erortzen diren forma oker interesgarrien zama jaso balute bezala, borroka geometrikoago moduko batean.

Ez zen nahita egindako ezer. Krasnerrek ez zuen inoiz prestaketa marrazkirik erabiltzen. Bere metodoa, berak deskribatu bezala, honako hau zen: "Lehen keinua egiten dut. Gero beste batzuk etortzen dira, eta gero behatu egiten dut. Mugimendu abstraktuan forma bat iradokitzen duen zerbait dago. Askotan, parte nagusia sortzen denean, harrituta gelditzen naiz aurrez aurre dudanarekin. Hortik aurrera, noraezean uzten dut neure burua. Edukia izan liteke organikoa, edo oso abstraktua, baina ez dago behartutako erabakirik. Pintatzearen ekintzaren bitartez niretzako zerbait lortu nahi dut. […] Bat-batekotasunaren bitartez elikatzen dut prozesuan dudan interesa”.