Lee Krasner. Kolore Bizia

Iruzkinak

Mosaikodun mahaia [Mosaic table], 1947

Neguak latzak ziren Long Island inguruan. Eta Krasnerrek eta Pollockek ezin zutenez berogailua etxeko bi solairuetan aldi berean jarri, Krasner beheko solairura aldatu zen, eta, horrela, bikotearen beste premiatako batez arduratzen hasi zen: altzariez, hain zuzen ere.

Bi mahai-taula egin zituen gurdi baten gurpilekin, eta mosaikoak sortu zituen, hondartzan bildutako maskor eta harri koskorrekin, mailukadaka berdindutako imitazioko bitxiekin, txanponekin, giltzekin eta Pollocki Federal Art Projectentzat egindako mosaiko batean sobran gelditu zitzaizkion beirazko teselekin. Ekimen hark zerikusi zuzena zuen ezer ez botatzeko joerarekin, Depresio Handiaren alaba baitzen Krasner, baina baita Springseko baso eta hondartzak bere etxera eramateko bultzadarekin ere.

Lan horien bitartez, collagera itzuli zen Krasner, hain zuzen ere War Servicen erakusleihoetan esperimentatzen hasi zen teknikara. Ez dira soilik dekoraziorako piezak, Irudi txikiak sortaren parte ere badira: kolorearekin eta formarekin egindako esperimentuak, non izaera misteriotsua eta pertsonala hartzen baitzuen formak. Gainera, bere obran hain maitea zuen baina bere lanek dagoeneko irudikatzen ez zuten ingurune natural hura artelanean sartzeko aukera eman zioten.

Mahai haiek portxean eta egongelan erabili zituzten, hautsontziak eta martini ontziak uzteko. Haietako bat New Yorkeko Bertha Schaefer Gallery-n antolatutako The Modern House Comes Alive [Etxe modernoak bizia hartzen du] izeneko erakusketan erakutsi zen, eta pieza nagusia izan zen, gainera, erakusketako geletako batean. Erakusketa hartan bertan, beste geletako batean, Schaeferrek beste mahai bat erakutsi zuen; mahai hartako taula Irudi txikiak sortako lan bat zen, beira baten azpian jarria. Krasnerren beste pintura bat zegoen horman zintzilik, sail berekoa. Hura izan zen kritikariek, bai New York Herald Tribune bai New York Times egunkarietan, Krasnerren lana goraipatu zuten lehenengo aldia.