Lee Krasner. Kolore Bizia

Iruzkinak

Basoa, 2. zk. [Forest no. 2], 1954

1951n egin zuen Krasnerrek bakarkako lehenengo erakusketa. New Yorkeko Betty Parsons Gallery-n izan zen, abstrakzio geometrikoko hamalau mihiseko sail batekin. Lan haiek oso harrera ona izan bazuten ere, ez ziren saldu. Norabidea aldatu nahian, tinta beltzeko marrazkietan hartu zuen babesa.

Honela gogoratu zuen geroago: “Marrazkiz gainezka neuzkan nik estudioko hormak […] lurretik sabaira buelta osoan. Sartu nintzen egun batean, asper-asper egina nengoen, kendu nituen marrazki guztiak paretatik, txiki-txiki egin nituen eta lurrera bota nituen… eta itzuli nintzenean —pare bat aste igaro ziren atea berriz ireki nuen arte— […] zorua erabat estalita zegoen nik han utzitako marrazki-puskez”.

Inspirazio iturri izan ziren lurrean osatutako ustekabeko justaposizio haiek. Saldu gabe gelditu zitzaizkion hamalau mihise haietatik hamabi puskatu zituen, eta collage sail bat hasi zuen horiekin. Basoa, 2. zk. lanak Autorretratua lanaren kutsua du, eta artistak bere Springseko etxe ondoko basoak ere hartu zituen inspirazio-iturri. Altua da mihisea, irudikatzen dituen zuhaitzak bezala, eta paper eta mihise zatiak ditu, pinturaz zikinduak. Eguzki-izpiek zeharkatzen duten baso baten barruan sartuta ikusten du ikusleak bere burua. Irudi txikiak sailean gertatzen den bezala, mihiseak ezin dio basoari eutsi, "naturaren argazki handitu bat" balitz bezala, Fairfield Porter pintore eta kritikariaren hitzetan.

Collage horien erakusketa New Yorkeko Stable Gallery-n antolatu zen, 1955. urtean, eta hamarkada hartako garrantzitsuenetako bat izan zen, Clement Greenberg arte kritikariaren ustez.