Picasso eskultore. Materia eta gorputza
4. Burua, 1928ko urria
6. Emakume-burua, Boisgeloup, 1931
Iruzkinak
5. Figura: Guillaume Apollinaireren omenezko monumentu baterako proiektua, 1928ko udazkena
- Izenburua:
- 5. Figura: Guillaume Apollinaireren omenezko monumentu baterako proiektua, 1928ko udazkena
- Erakusketa:
- Picasso eskultore. Materia eta gorputza
- Gaiak:
- Heriotza | Artelanak | Eragin artistikoa | Esperimentazio artistikoa | Sorkuntza artistikoa | Geometria | Lan-prozesua | Centro de Arte Reina Sofía | Frantzia | Guillaume Apollinaire | Julio González | Teknika eta materialak
- Mugimendu artistikoak:
- Abangoardia
- Artelan motak:
- Eskultura
- Aipatutako artistak:
- Picasso, Pablo
Guillaume Apollinaire olerkaria 1918ko azaroan hil zen. Handik bi urtera, hogeita zortzi kidez osaturiko batzorde batek iragarri zuen monumentu bat eraikiko zutela haren hilobian. Batzordekideen artean Picasso eta Apollinaireren alarguna zeuden.
Arazoak sortu ziren berehala; ez hainbeste alderdi ekonomiari lotuak, behar beste diru bildu baitzuten enkante bidez, baizik eta Apollinaireren figurari lotuak, bai eta hark abangoardiako zenbait mugimendurekin izandako harremanari lotuak ere. Picassok enkarguak onartzeko ohiturarik ez bazuen ere, hari agindu zioten monumentua sortzeko zeregin zail hura. Picassok, orduan, hainbat zirriborro egin eta forma geometrikoz osaturiko giza irudi lerdenak irudikatu zituen; irudi horiek lotura zuten Apollinaire surrealistak idatzitako “Poeta eraila” izeneko kontakizunarekin. Prosazko lan horretan, Apollinairek Beningo txoria balitz bezala aurkeztu zuen Picasso, zeinak “ezerezaz egindako estatua bat, hutsez egina” zizelkatzen baitu olerkari zenduaren hilobirako.
Batzordeko kide gehienek espero zuten Apollinaireren hilobirako monumentua estilo errealistako obra izatea, baina Picassok bere independentziari eutsi zion, eta ez zuen amore eman batzordearen eskarien aurrean. Espero zenaren ordez, alanbre soldatuzko eraikuntza-proposamen ugari aurkeztu zituen. Ideia haiek eskulturara eramateko, Picassok laguntza eskatu zion Julio González eskultoreari, haren trebetasun teknikoa baliatzeko.
Ez zuten onartu Picassok Apollinaireren hilobiko monumentua egiteko aurkeztu zuen proposamenetako bakar bat ere, ezta areto honetan ikusgai dagoen Emakumea lorategian ere. Azken hori elkarren artean artekatutako metalezko barraz eta ebakinez osatuta dago, begiak errematxeak dira, eta hostoak alanbre bidez daude eutsita.
Picassok zuriz margotu zuen obra horren lehen bertsioa. Hurrengo urtean, brontzezko bertsioa egiteko agindu zion Gonzálezi, eta bertsio horixe dago areto honetan ikusgai. Reina Sofía museora iritsi baino lehen, eskultura naturaren erdian egon zen kokatua, artistarena zen Boisgeloupeko parkean.