Picasso eskultore. Materia eta gorputza
16. Gizona bildotsa hartuta, Paris, 1943ko martxoa
18. Neskatoa soka-saltoan, Vallauris, 1950–54
Iruzkinak
17. Emakumea haurdun (bigarren urratsa), Vallauris, 1959
- Izenburua:
- 17. Emakumea haurdun (bigarren urratsa), Vallauris, 1959
- Erakusketa:
- Picasso eskultore. Materia eta gorputza
- Gaiak:
- Emakumea artean | Giza gorputza | Eragin artistikoa | Sorkuntza artistikoa | Sormena | Lan-prozesua | Hondakinak | Materialak | Sinbologia | Frantzia | Françoise Gilot | Amatasuna
- Mugimendu artistikoak:
- Espresionismoa
- Artelan motak:
- Eskultura
- Aipatutako artistak:
- Picasso, Pablo
1948an, Vallauris herriko La Galloise izeneko etxetxo batera joan ziren bizitzera Picasso eta haren neska-lagun Françoise Gilot, kostaldetik eta Cannesetik kilometro gutxira. Bertan bazegoen Picassok 1946an ezagututako buztinola bat. Madoura izeneko tailer hura, Suzanne eta Georges Ramié-ren jabetzapekoa, bitarteko berri horrekin esperimentatzeko lekua izan zen Picassorentzat.
Etapa horretan, Picassok bi seme-alaba izan zituen Françoise Gilotekin, Claude eta Paloma, eta Le Fournas izeneko lurrin-lantegi bateko eraikin zahar bat erosi zuen, estudio gisa erabiltzeko. Etxetik tailerrera bitarteko bidean, hondakindegi gisako bat zegoen, non tokiko eltzegileek hondakintzat jotzen zuten gauza oro botatzen baitzuten. Material horietako batzuk inspirazio-iturri izan ziren Picassorentzat, eta obrak sortzeko berreskuratu zituen; adibidez, emakume haurdun baten eskultura hau sortzeko. Horrela, beste batzuek botatzen zutena artistak esanahiz eta edertasunez beteriko arte-pieza bihurtzen zuen.
Picassok lurrin-lantegian egindako lehen eskulturetako bat Emakumea haurdun izan zen. Françoise Gilotek honela deskribatu zuen obraren lehen urratsaren sortze-prozesua: "Bularrak eta abdomen lasaia osatzeko, hiru ur pitxer erabili ziren; sabela pitxer handi batekin egina da, eta bularrak, bi pitxer txikiagorekin, guztiak ere hondakin-mordotik berreskuratuak". Horrela, Picassok eguneroko objektuak eta objektu baztertuak erabili zituen eskultura itxuratzeko, elementu mundutarrak figura femeninoaren irudikapen artistiko bihurtuta.
Emakumea haurdun lanaren lehen urratsa brontzez egin ondoren, Picassok obraren bigarren urratsa landu zuen, betiere lehenbizikoaren brontzea urtzeko erabilitako igeltsutik abiatuta. Emankortasunaren jainkosa peto-petoa da. 1958an datatutako argazkiei esker ikus dezakegu xehetasun anatomiko batzuk erantsi zizkiola artistak azken unean Emakumea haurdun obraren bigarren urratsari, hala nola titiburuak eta zilborra, eta nabarmen handitu zuen oinen tamaina, oinarri sendoagoa sortzeko. Horrela, Picassok eskultura aldatzen eta fintzen jarraitu zuen, adierazkortasun eta oreka estetiko handiagoa emanez.