Picasso eskultore. Materia eta gorputza
15. Burezurra (Hildako baten burua), Paris, 1943ko maiatza
17. Emakumea haurdun (bigarren urratsa), Vallauris, 1959
Iruzkinak
16. Gizona bildotsa hartuta, Paris, 1943ko martxoa
- Izenburua:
- 16. Gizona bildotsa hartuta, Paris, 1943ko martxoa
- Erakusketa:
- Picasso eskultore. Materia eta gorputza
- Gaiak:
- Giza gorputza | Heriotza | Interpretazioa | Eragin artistikoa | Ibilbide artistikoa | Sorkuntza artistikoa | Lan-prozesua | Sinbologia | Erakusketak | Gerra | Bigarren Mundu Gerra | Nazismoa | Paris | Teknika eta materialak
- Mugimendu artistikoak:
- Degenerate art | Espresionismoa
- Artelan motak:
- Eskultura
- Aipatutako artistak:
- Picasso, Pablo
1943an, prestakuntza-marrazki asko egin eta gero, Picassok egun bakar batean modelatu zuen Gizona bildotsa hartuta. Gerraren testuinguruan jarrita, obra honen ikonografiari buruzko azterlan asko egin izan dira ikuspuntu erlijioso, mitologiko eta historikotik. Picassok hauxe esan zuen artelanaz egindako interpretazio bibliko batzuen inguruan: “Honek ez du erlijioarekin zerikusirik. Gizonak txerri bat eraman zezakeen ardi baten ordez! (...) Gizona bildotsa hartuta lanean giza sentimendu bat adierazi nuen, besterik gabe; lehen bezala gaur ere hortxe jarraitzen duen sentimendu bat".
Orain dakusagun eskulturak gizon bat irudikatzen du, eta gizonaren aurpegi zargalduak Burezurra (Hildako baten burua) lanekoarekin dauka antza; beste lan hori ere garai berean sortua da, eta areto honetan dago ikusgai baita ere. Gai horri buruzko lehen marrazkietan, Gizona bildotsa hartuta lanak arkume fidakor bat samurtasunez besoetan zeraman pertsona bat irudikatzen zuen; zirriborroen bilakaerak aurrera egin ahala, ordea, animaliari eusten ageri da gizona, arkumea besoetan bihurritzen zaiola, eskultura honetan ikus dezakegun bezala. Eszenak atzean utzi du tonu bukolikoa, eta, behin betiko bertsio honetan, erresistentzia-ekintza bilakatu da.
Obra hau Parisko 1944ko Udazken Aretoan jarri zen ikusgai lehen aldiz. Erakusketa hura Askapenaren Aretoa izenez ezagutzen da, aliatuak Parisen sartu eta hilabete baino gehixeagora egin baitzen. Lan hau Picassok erakusketa hartan aurkeztutako bost eskulturetako bat izan zen, artistaren 70etik gora margolanekin batera ikusgai jarria, suntsiketa-garai hartan ondutako artelan-kopuru izugarriaren erakusgarri. Ekoiztea, lan egitea eta sortzea bera errebeldia-ekintzak ziren Picassok pintura frantsesa heriotzara eraman zuela defendatzen zutenen aurka.