Picasso eskultore. Materia eta gorputza

Iruzkinak

1. Sarrera

Ongi etorri Picasso eskultore. Materia eta gorputza erakusketara, XX. mendeko artista handiari eta haren eskulturagintzari eskainia.  

Eskultura funtsezko bitartekoa da Picassoren obran. Izan ere, artista malagarrak bere karreraren hastapenean ekin zion eskultura-lanak egiteari, XX. mendearen hasieran, eta bere bizitzaren ia amaieraraino jarraitu zuen haiek sortzen. Eskulturan denetariko materialak, formatuak eta generoak landu zituen, eta bere ekarpenaren gauzarik garrantzitsuena ez da berak ondutako eskultura-lanen kopurua eta aniztasuna, baizik eta, batez ere, lan horiek ekarritako berrikuntza formal eta estetikoa.

Konparazioetan sartu gabe margolanek eskultura-lanen aldean duten garrantziaz, ukaezina da denbora gehiago behar izan zela Picassoren eskultura-arloa aintzat hartzeko eta hura jendaurrean berariaz erakusteko. Izan ere, 1967ra arte, hau da, ia bere ibilbidearen amaierara arte, ez zen bere eskulturan soilik oinarritutako erakusketarik ekarri museoetara. Hori itxuraz kontraesanean dago bitarteko horrek Picassorentzat izan zuen garrantziarekin, harentzat eskultura ez baitzen izan bigarren mailako kontua, pinturarekin parekatzeko moduko adierazmoldea baizik.

Eskulturaren barruan, giza gorputza gai nagusia izan zen Picassoren obran, giltzarria. Bere ibilbidean zehar, gorputza Picassoren arte-adierazpenaren funtsezko zutabea izan zen, bai eta bere sormenaren tresna nagusia ere.

Erakusketa hau artistaren heriotzaren 50. urtemuga gogoratzeko ekitaldien baitan dago, eta agerian jartzen du gorputzak Pablo Picassoren obra eskultorikoan izandako garrantzia.

Erakusketa Guggenheim Bilbao Museoak antolatu du Museo Picasso Málagarekin lankidetzan, Pablo Picassoren heriotzaren 50. urteurrena ospatzeko Batzorde Nazionalaren laguntzarekin eta Musée National Picasso-Paris museoaren aparteko lankidetzarekin. Telefónica da Picasso Ospakizuna 1973–2023 ekimenaren enpresa laguntzailea espainiar estatuan.