Hilma af Klint
Pertzeval saila
Pertzeval saila, III multzoa (Serie Parcifal, Grupp III), 1 zk., 1916
Ikuspuntua
Budaren ikuspuntua bizitza mundutarrean, II saila (Budhas ståndpunkt i jordelifvet, Serie II), 3a zk., 1920
Iruzkinak
Atomoa sailaAtomoa saila (Serie Atomen), 8 zk., 1917
- Izenburua:
- Atomoa sailaAtomoa saila (Serie Atomen), 8 zk., 1917
- Erakusketa:
- Hilma af Klint
- Gaiak:
- Emakumea artean | Artea eta zientzia | Eragin artistikoa | Ibilbide artistikoa | Esperimentazio artistikoa | Forma | Geometria | Kolorea | Konposizioa | Espiritualtasuna | Teosofia
- Mugimendu artistikoak:
- Arte Abstraktua
- Artelan motak:
- Pintura
- Aipatutako artistak:
- Af Klint, Hilma
Zortzi zenbakiarekin identifikatutako akuarela honetan, karratu handi bat ageri da lautan banatuta, erdian zirkulu bat duela. Haren gainean, diagonalean dagoen karratu beltz txikiago batek irudi nagusia islatzen du. Af Klintek lan honetan txertatu zuen testuan hauxe ageri da idatzita: [Af Klintek berak kontatuko balu bezala] “Plano etereoan ageri den atomoa etengabe dabil atsedenaren eta jardunaren artean. Atsedenean, bere baitan biltzen da. Horrek lurreko atomoari eragiten dio, hark energia igortzen du eta energia hori kanpora askatzen da”.
Sail osoan zehar, atomo-forma geometrikoen antzeko eskema bat errepikatzen da. Artistaren oharrek aditzera ematen dutenez, atomoak bakartasunerako garapen-prozesu bat bizi du, artistak beraren sinesmenen bide espiritualarekin aldera daitekeena. Af Klintek kontzeptu zientifiko eta espiritualak esploratzeko baliatzen zituen forma abstraktu horiek, errealitatearen bestelako dimentsio bat agerian uzteko xedez; normalean esperimentatzen duguna ez bezalako dimentsio bat, alegia. Hain zuzen ere, artistaren garaian egindako hainbat aurkikuntza zientifiko frogatzen hasiak ziren badela unibertso bat mundu behagarritik harago. Zabalkunde handia izan zuen, adibidez, Ernest Rutherford eta Niels Bohrrek atomoen izaera nuklearrari buruz eginiko ikerketak, zeinak agerian utzi baitzuten atomo baten karga positiboa nukleoan dagoela gehienbat, eta elektroiak, aldiz, zentro horren inguruan ibiltzen direla orbitan. Soinu-uhinak, X izpiak eta partikula subatomikoak izan ziren orduko beste aurkikuntza zientifiko liluragarri batzuk: guztiak ere errealitate ikusezinak. Af Klinten garaian, zientzia eta pentsamendu espirituala hainbat modutan zeuden lotuta: zientzialari konbentzionalek esperimentuak egiten zituzten ideia espiritistak probatzeko, eta pentsalari espiritualek, berriz, zientzia txertatzen zuten beren lanean, neurri batean beren ideiak baliozkotzeko. Teosofoek ziotenez, iragarmenaren bidez ikus zitekeen atomoa. Af Klinten aburuz, atomoekiko zeukan interesak lotura zuen, baita ere, mundu naturalak pizten zion lilurarekin; haren ustean, atomoak kosmosera sartzeko atea ziren.