Oteiza: Mitoa eta modernotasuna
Malevich Unitate makurrak eta lauak [3B Aretoa – Esferaren desokupazioa]
Laborategi esperimentala [3C Aretoa – Laborategi esperimentala]
Iruzkinak
Esferaren desokupazioa [3B Aretoa – Esferaren desokupazioa]
- Izenburua:
- Esferaren desokupazioa [3B Aretoa – Esferaren desokupazioa]
- Erakusketa:
- Oteiza: Mitoa eta modernotasuna
- Gaiak:
- Artea eta espazioa | Esperimentazio artistikoa | Sorkuntza artistikoa | Espazioa | Forma | Geometria | Mugimendua | Dualtasuna
- Artelan motak:
- Eskultura
- Aipatutako artistak:
- Oteiza, Jorge
Obra sorta honek Oteizak esferarekin egindako lanen aldi definitiboena adierazten du. Pentsa dezagun hutsik dagoen esfera batean. Bere barruko espazioa eta bere kanpoko espazioa erabat bereiziak eta inkomunikatuak dauden errealitateak dira. Errealitate neutroak dira gainera, aktiboak ez direnak, hau da, barruko espazioa eduki izatera mugatzen da eta kanpoko espazioa esfera inguratzera. Ikerlanaren fase honetan, esfera hausten saiatu zen Oteiza, soilik energia-espazio gisa ager zedin. Horretarako, elementu linealen konbinazioak erabili zituen, eta kurbatura desberdinez forma ematen zien forjan. Elementu horiek elkarrekin konbinatuak, mugimendu handiko multzoak sorrarazten dituzte, nukleo baten inguruan abiadura desberdinez asaldatzen direnak.
Urakanetan sosegua eta baretasun handia dagoen “urakanaren begia” deitutako horren inguruan bortiztasun eta asaldura handia sortzen den bezala, horrela Oteizak espazio geldia eta hutsa sortu eta isolatu egiten du bere inguruan asaldurazko eta astinaldizko ingurunea sortuz.
Hori guztia oso argi ikus daiteke Elementu makur eta arinen bi pareren konjuntzio dinamikoan. Bertan, kurbatura handiko arkuek espazio biribil bat zehazteko gero eta abiadura handiagoa hartzen duen mugimenduari hasiera ematen diote.
Esferaren desokupazioaren azpiproduktu mugikorra abiadura desberdinetako mugimenduaren estudio bat da, espazio zehatz bat itxuratu aurretik elementu kurbatu horien konbinazioak eragindako mugimenduarena.
Alboko oinarrian dauden bi piezetatik Esferaren desokupazioa. Ondorio esperimentala 1., sail honen laburpen eta ondorio gisa proposatutako obra da. Bertan, Oteizak sinplifikatu egiten ditu elementuak, esfera formara mugatzeko. Hiru luzera desberdin dituzten hiru elementu kurbatuk baretasunez besarkatzen dute espazio hutsa.