Surrealismoaren gauzak
Sarrera
Jaka afrodisiakoa, Salvador Dalí
Iruzkinak
Dantzaldia balleteko dekoratuak eta jantziak
- Izenburua:
- Dantzaldia balleteko dekoratuak eta jantziak
- Erakusketa:
- Surrealismoaren gauzak
- Gaiak:
- Artea eta ekonomia | Artea eta politika | Artea eta umorea | Sorkuntza artistikoa | Sormena | Mugimendua | Eszenografia | Jantzi-diseinua | Kontsumoa | Balleta
- Mugimendu artistikoak:
- Surrealismoa
- Aipatutako artistak:
- de Chirico, Giorgio | Ernst, Max | Miró, Joan
Artista surrealista askok Ballet Russes dantza-konpainiarentzat lan egin zuten. Antzerkiak irudizko mundu berriak sortzea ahalbidetzen zien. Baina artista haiek halako eremuetan lan egiteak gatazkak sorrarazi zituen surrealisten artean. Hala, mugimenduko alderdi politikoenak mundu komertzialaren menpe jarri izana leporatu zieten haiei. Horren adibide dugu Max Ernst-en eta Joan Miró-ren kasua: Romeo eta Julietarako dekoratuak diseinatu zituzten eta, protesta moduan, surrealista erradikal batzuek zapuztu egin zuten 1926ko obraren estreinaldia.
Le Bal edo Dantzaldia izeneko 1929ko produkzio honetarako dekoratuak eta jantziak Giorgio de Chirico-k diseinatu zituen. Dekoratuetarako arkitektura klasikoan inspiratu zen. Eta jantzietarako, bizidun bihurtutako estatuen eta dantzaldi surrealista bateko gonbidatuen arteko konbinazioa erabili zuen.
Will Tuckett dantza garaikideko koreografoa da:
Jantziak osotasunean ikusita, hauxe da niretzat gauzarik zoragarriena: ukitu grafiko ero hori, gaur egun nekez aurki daitekeena. Egun nahiko zaila da artistekin elkarlanean aritzea eta, kasu honetan bezala, lan serioa egitea eta aldi berean umoretsua izatea.
Jeneralaren uniformeak, adibidez, nabarmendu egiten du jantzi horien funtzioa, eta honek bereziki halako xehetasun batzuk ditu, nire ustez oso orijinalak direnak: sorbaldetan hain modu bitxian gorantz begira dauden txarratela horiek, adibidez. Imajinatu uniformea daraman pertsonaia sorbaldak gora eta behera astinduz; sortuko zen irudia bitxi bezain zoragarria izango litzateke. Bestalde, erantsiak dituen domina horiek oihal gainean marraztuak daudela ematen du. Eta borla-formako gerriko moduko horrek, gortina-zati bat ematen du; zoragarria benetan!
Bueltatuz gero, lehertzen ari den granada bat bizkarrean duela ikusiko dugu. Hala, Jeneral bat dela aditzera ematen digu, baina militar bat dela ere inoiz ez ahaztu gabe.
Eta nire ustez jantzi hauek duten gauza berezietako bat hauxe da, berez mugimendua zehazki deskribatzen ez badute ere, pertsonaia baten ideia eta mugituko litzatekeen modua iradokitzen digutela. Eta liluragarria iruditzen zait hori, oso lan zaila eta asmamen handikoa gainera.