Louise Bourgeois. Izatearen egiturak: Gelak

Iruzkinak

Likido preziatuak (Precious Liquids) 

Artelan zilindriko garai hau Likido preziatuak deitzen da. Gainontzeko gelen gainetik nabarmentzen da, paretak ez baitaude berreskuratutako atez edo oihal metalikoz eginda. Garai bateko ur-andel bat da, New Yorkeko teilatuetan egoten zirenetakoa. Bourgeois-en Brooklyngo estudioko teilatuan zegoen. 1980an alokatu zuen; aurretik etxean aritzen zen lanean. Estudio zabalak lehendabiziko aldiz aukera eman zion hau bezalako eskala handiko instalazioak egiteko. Ur-andela desmuntatu behar zutela ikusi zuenean, Bourgeoisek berehala eskatu zuen bere estudiora eraman zezatela. Ondo agerian uzten du artistak aurkitutako materialekin zeukan zaletasuna. Berreskuratutako eguneroko objektuek denboraren joana erakusten dute eta, beraz, iraganaz hitz egiten digute. Andelak jatorriz zeukan zereginari lotuz, artistak likidoekin lan egin zuen: gorputz-fluidoen ikur ziren likidoekin.

Gelak ohe baten burdinazko euskarria dauka barruan, eta hari kristalezko ontzi bat gehitu zaio. Ezker eta eskuin, beirazko flaskoak eusten dituzten poste metalikoak daude. Ohearen aldamenean eskegita, ume baten kamisola zuria ezkutatzen duen beroki beltza eta luzea dago. Ingelesezko “mercy” eta frantsesezko “merci” hitzak daramatza josiak; ingelesez “erruki” eta frantsesez, berriz, “eskerrik asko” esan nahi dute. Aurrean gomazko bi bola beltz daude eta, berokiarekin batera, zakil eta barrabil batzuen itxura hartzen dute. Eskuinera, berriz, alabastrozko bi forma obalatu daude, bata bestearen gainean; 1970eko hamarkadako Le Trani gertakizuna (Le Trani Episode) artelanaren bertsioa dira. Astiroago erreparatuz gero, bularrak direla ohartzen gara. Gorputzaren fluidoen laborategi bat da. Bourgeoisek artelan hau Kasselgo Documenta IX erakusketara eraman zuen 1992an. Artistari, ordurako 81 urte zituela, Europan ere fama heldu zitzaion, bat-batean.