Pertzepzio aldakorrak: Guggenheim Museoaren Panza Bilduma
Larry Bell
Richard Serra
Atalak
Richard Nonas
- Izenburua:
- Richard Nonas
- Erakusketa:
- Pertzepzio aldakorrak: Guggenheim Museoaren Panza Bilduma
- Gaiak:
- Artea eta espazioa | Artea eta pertzepzioa | Arkitektura | Sorkuntza artistikoa | Materiala
- Mugimendu artistikoak:
- Post-Minimalismoa
- Artelan motak:
- Eskultura | Kokapen zehatzerako artea
- Aipatutako artistak:
- Nonas, Richard
Antropologia-ikasketak egin eta 1966ra arte arlo horretan lan egin ondoren, Richard Nonas (1936–) bere garaiko artista asko baino geroxeago sartu zen New Yorkeko artearen munduan. Nonasen lanak minimalismoaren ondoko etapa adierazten du, ingurune zehatz batean ikusleak objektu bat behatzen duen moduari buruzko azterketan oinarritua. Bere lanek objektu independente gisa agertu beharrean inguruan duten espazioarekin elkarrizketa bat sortzen dute, arkitekturarekin elkarreraginez. Erakusketa honetarako, Nonasek 1974ko Muga-gizona lana sortu du berriro, aretoaren ezaugarrietara egokituz. Tamaina bereko altzairuzko hamalau barra erabili ditu (jatorrizko hamaika horien ordez) museoaren leku jakin batean ordena espazial alternatibo bat sortzeko. Barruti bat eratuz, altzairuzko lerro horiek bigarren mailako lurralde bat zehazten dute, bertako arkitekturarekin elkarreraginez eta aldi berean berau birmoldatuz. Ikusleak mugitzeko eragozpenik ez duen arren, irudimenezko zona baten mugak zehaztera behartua dago.
Nonasek beti erabili izan ditu baliabide gutxi eskulturaren ezaugarri nagusiak definitu eta aztertzeko, bere materialen izaera mugatuak eta sinpleak adierazten dituzten kontraesanekin eta konplexutasunekin kontrastatzen duten arren. Salita Nord seriea osatzen duten obretatik hiru altzairuzko xafla lauen itxuraketa desberdinak dira, batzuk besteei eutsita, eta nabarmendu egiten dute xaflen azpian dagoen espazio negatiboa eta muntaia hauetan diharduen grabitatearen indarra. Nonasek idatzi batean dioenez, “eskultura batzuk argigarriak dira, beren asmoa diskurtsiboa eta literarioa da; eta horretan ez dut interes handirik. Baina beste eskultura batzuk zehatzak, tinkoak, isilak dira; ia ikaragaitza den indarra dute. Hor daude, beren presentziak liluratuta uzten gaitu ezer ere esan gabe. Hor daude, besterik gabe”.