Pertzepzio aldakorrak: Guggenheim Museoaren Panza Bilduma
Robert Morris
Atalak
Robert Ryman
- Izenburua:
- Robert Ryman
- Erakusketa:
- Pertzepzio aldakorrak: Guggenheim Museoaren Panza Bilduma
- Gaiak:
- Artea eta industria | Artea eta espazioa | Artea eta pertzepzioa | Esperimentazio artistikoa | Sorkuntza artistikoa | Kolorea | Materiala
- Mugimendu artistikoak:
- Minimalismoa
- Artelan motak:
- Pintura
- Aipatutako artistak:
- Flavin, Dan | Judd, Donald | Ryman, Robert
Robert Ryman (1930–) 1952an hasi zen pintatzen eta pinturaren teknikak bere kasa ikasten. Prestakuntza autodidakta hori 1953an sendotu zuen, New Yorkeko Museum of Modern Art-eko jagole-postua onartu ondoren, bertan sakontasunez aztertu baitzituen beste artista batzuek pinturaren arloan egin zituzten ikerketak.
1965erako, bere ikerketa haiek paletan erabiltzen zituen koloreak murriztera eraman zuten. Kolore bakar bat, zuria hain zuzen, bere obraren ezaugarritzat aukeratu ondoren, zenbait arazo formal arakatzeari ekin zion. Bere esperimentuetan metodikoki aztertzen ditu pinturak eta euskarri desberdinek dituzten ezaugarriak, beren arteko elkarrekintzek sortutako ustekabeko emaitzei era espontaneo batean erantzunez eta materialen ñabardurak, egindura, tamaina, kolorea eta akabera agerian utziz. Horrez gain, pinturaren eta arkitekturaren arteko lotura konbentzionala aztertzen du, bere koadroek markorik ez edukitzeak argi erakusten duenez, hauen eta esekita dauden paretaren arteko lotura zuzena azpimarratzearren.
Gainerako minimalisten helburuetatik bereizten duena hauxe da, berak landutako baliabide bakarra pintura izatea eta baliabide horren manipulazioa nabarmentzen duen modua. Bere heldutasun artistikoa minimalismoaren gainerako artista aipagarriekin batera lortu zuen arren, esaterako Dan Flavin eta Donald Judd, eta serie-produkzioko metodoak eta beira-zuntza eta altzairua bezalako material industrialak erabili zituen arren, Rymanek oso argi dauka zertan bereizten den bere ikuspegia: “Minimalistek makinaz eginak izatearen itxura lortu nahi zuten beren obretan. Ez zituzten pintzelen markak ikusi nahi, ez eta panel bakoitzak eskuz egindako gauzek duten itxura berezi samarra izatea ere”. Rymanek, berriz, pinturaren inguruan egiten ari zen ikerketan arazo formal eta tekniko guztiak ikusteko modukoak izatea nahi zuen.